ShQO-da adamdardyń brýtsellez juqtyrýy 1,6 esege artty
Oblystyq Sanıtarlyq-epıdemıologııalyq baqylaý departamentiniń málimetine súıensek, jyl basynan óńir jurtshylyǵynyń arasynda brýtsellez juqtyrǵandar sany 25-ke jetti. Bul kórsetkish byltyrǵy jyldyń sáıkes kezeńimen salystyrǵanda 1,6 ese artqan.
«Aýrýdyń taralýy oblystyń 7 qala, aýdanynda anyqtaldy. Atap aıtqanda, Zaısan aýdanynda – 8 Tarbaǵataı aýdanynda jáne Óskemen qalasynda – 5, Kúrshim aýdanynda – 3, Ulan aýdanynda – 2 jáne Rıdder qalasy men Glýbokoe aýdanynda – 1 jaǵdaı. Sondaı-aq 14 jasqa deıingi balalar arasynda brýtsellezben syrqattanýdyń 4 deregi tirkeldi. Al jasóspirimder arasynda aýrý juqtyrǵandar joq. Belgili bolǵandaı, indettiń taralýyna aýyl sharýashylyǵy janýarlary sebep boldy», – deıdi basqarma basshysynyń orynbasary Sáýle Slıamǵazına.
Sonymen qatar bıyl Óskemen turǵyny kúıdirgi (sibir jarasy) juqtyrdy degen kúdik boldy. Birden epıdemııaǵa qarsy sharalar qolǵa alyndy. Synama nátıjeleri teris shyǵyp, kúdik alyndy.
«Oblys emhanalaryna jándikterdiń shaǵýynan, janýarlardyń tyrnaýynan jáne tisteýinen zardap shekken 1418 adam júgindi. Barlyq patsıentterge antırabııalyq egý kýrsy taǵaıyndaldy. Tek 3 adam ǵana ımmýndaýdan bas tartty», – deıdi S.Slıamǵazına.