ShQO-da «Abaı álemi» kitaptar toptamasynyń tusaýkeser rásimi ótti
Uly Abaı esimin ıelengen teatr qabyrǵasynda ótken is-sharaǵa akademık Ǵarıfolla Esim, Qazaqstan jazýshylar Odaǵynyń tóraǵasy Ulyqbek Esdáýletov, arheolog, t.ǵ.d. Zeınolla Samashev, jazýshy Álibek Asqarov pen Borıs Şerbakovtar jáne «Abaı áleminiń» redaktsııalyq top jetekshisi, belgili sátbaevtanýshy, jazýshy Medeý Sársekeev qatysty.
Qala jurtshylyǵy men qonaqtarǵa arheologııalyq qazba jumystary nátıjesinde mol tarıhı muramyzdy qalyptastyrǵan «Uly dalanyń altyn jádigerleri» men qazaq zergerlik óneriniń ótkeni men búgini týraly mol maǵlumat beretin «Kúmis sıqyry» zergerlik óner kórmesi usynyldy.
«Art Zaman» jobasy aıasynda oblystyń kórkem sýret qoryn baıytqan Jantaı Shardenov, Salıhıtdın Aıtbaev, Maǵaýıa Amandolov, Bahtııar, Azat Tábıevter jáne taǵy basqa sýretshilerdiń qolynan shyqqan týyndylar semeılikterdiń týǵan ólkeniń tumsa tabıǵaty, ótken tarıhy, ulttar dostyǵy men jarqyn bolashaǵy týraly tanymyn keńeıtti.
Kesh barysynda oblys ákimi Danıal Ahmetov shyǵysqazaqstandyqtardy elimizdiń basty merekesi - Táýelsizdik kúnimen quttyqtady. Teatr sahnasynda «Abaı álemine» engen shyǵarmalardan teatrlandyrylǵan kórinister qoıyldy.
Óńir basshysy tuǵyrly Táýelsizdigimizge qolymyz jetken kúnnen bastap, qazaq halqy óziniń biregeı dástúr-saltymen, rýhanı qazynalarymen qaıta qaýyshqanyn aıtty. Umyt bolǵan - uly esimder qaıta oralǵanyn atap ótti.
«Biz «Rýhanı jańǵyrý» baǵdarlamasy aıasynda Shyǵys Qazaqstannyń ádebı murasyn jas urpaq, kózi qaraqty oqyrmanǵa jetkizý úshin, arnaıy kitaptar toptamasyn shyǵarýdy qolǵa aldyq. Abaı - elimizdi jeti qarańǵy túnde adastyrmaıtyn temir qazyq! Uly Prezıdentimiz árqashan hakim sózin boıtumarǵa balap jas urpaqty, buqara halyqty izgilik jolyna shaqyryp otyrady. Sol sebepti, jobanyń «Abaı álemi» atanýy, Abaıdan bastalýy oryndy sheshim, zańdy qubylys dep esepteımin!», - dedi ol.
Kitaptar toptamasynyń alǵashqy basylymynda uly Abaı, kemeńger Shákárim, dana Muhtar, Fedor Dostoevskııdiń buryn-sońdy jarııalanbaǵan shyǵarmalary jaryq kórdi. Budan basqa, jınaqqa «Amre v Parıje» estelik kitaby, Tóleý Kóbdikovtyń «Atandym óz tusymda Aqyn Tóleý», Marat Qabanbaevtyń «Týǵan jerdiń tórt mezgili», Anatolıı Ivanovtyń «Tenı ıschezaıýt v polden», Medeý Sársekeniń «Jarylys» jáne «Kómbe», Borıs Şerbakovtyń «Shyǵarmalary» endi.
Barlyq kitaptar oblys kitaphanalarynyń qorlaryna, al onyń elektrondyq nusqasy qazaq ulttyq elektrondyq kitaphanasynyń saıtynda ornalastyrylatyn bolady.
Kelesi jyl jastarǵa arnalǵandyqtan, ekinshi basylymdy jastar shyǵarmalarymen tolyqtyrý jóninde sheshim qabyldandy.
Osylaısha, 2019 jyly «Abaı álemi» serııasymen Shákir Ábenov, Saparǵalı Begalın, Semen Anısımov, Isa Bınazarov, Meńǵalı Mýsın, Dmıtrıı Cherepanovtar syndy otyzdan astam avtordyń shyǵarmalaryn jarııalaý josparlandy.
«Keleshekte biz Qazaqstan Jazýshylar Odaǵyna múshe bolǵan jerlesterimizdiń úzdik týyndylaryn shyǵarýdy jalǵastyratyn bolamyz. Bizge jas daryndardyń jınaqtaryn shyǵarýdy qolǵa alý kerek», - dedi Danıal Ahmetov óz sózin qorytyndylap.