ShQO-da 99 nárestege «Súıinshi» syıqoraby tartý etildi
«Azamattarǵa arnalǵan úkimet» memlekettik korporatsııasy ShQO fılıalynyń málimetine súıensek, 16-17 jeltoqsan kúnderi jaryq dúnıe esigin ashqan 99 nárestege Táýelsizdiktiń 30 jyldyq mereıtoıyna oraı baby-bokstar syıǵa tartyldy.
Onda bóbekterge qajetti zattardan basqa, QR Prezıdenti Qasym-Jomart Toqaevtyń quttyqtaý tilegi jazylǵan ashyq hat, «Táýelsiz Qazaqstanǵa 30 jyl» monetasy men balanyń týýy týraly kýáligi salynǵan.
«Aınalaıyn, bóbek! Seniń týǵan kúniń elimizdiń eń basty merekesimen tuspa-tus keldi. Óziń dúnıe esigin ashqan kezde halqymyz qasterli Táýelsizdiginiń 30 jyldyǵyn atap ótip jatty. Saǵan baqytty ári uzaq ǵumyr tileımin!», - dep jazylǵan Prezıdenttiń quttyqtaýynda.
Nárestelerdiń týý týraly kýálikterine ótinimderdi «Azamattarǵa arnalǵan úkimet» MK qyzmetkerleri qabyldap, AHAJ organdaryna joldaǵan.
«Táýelsizdik kúni týǵan sábılerdiń ata-analary merekeniń 30 jyldyǵyna oraı «Súıinshi» syıqoraptaryn aldy. Óńir boıynsha mereke kúnderi 99 bala dúnıege keldi. AHAT qyzmetkerlerine týý týraly kýálikterin resimdegeni, Qazposhta qyzmetkerlerine syıqoraptardy jetkizgeni jáne barlyq medıtsına qyzmetkerlerine qajyrly eńbekteri úshin alǵys aıtqym keledi, - dedi «Azamattarǵa arnalǵan úkimet» MK ShQO fılıalynyń dırektory Azamat Esembýlov.
16 jeltoqsanda oblysta dúnıege kelgen alǵashqy balanyń esimi - Ámire.
«Bizdiń úshinshi balamyz 16 jeltoqsanǵa qaraǵan túni jaryq dúnıe esigin ashty. Uıymdastyrýshylarǵa kóńil bólip, quttyqtaǵandary úshin úlken rahmet», - dep sábıdiń anasy Aqerke Bolatova alǵys bildirdi.