ShQO-da 93 myńnan astam bala jazǵy lagerge barady
ShQO Bilim basqarmasynyń málimetine súıensek, óńir boıynsha jaz kezinde til, sport, týrıstik, ólketaný jáne iskerlik lagerler jumys isteıdi. Jalpy sany 93 myńnan astam bala lagerge barmaq.
«Lagerler ishinde 19-y qala syrtynda, 195-i mektep janynda jáne 204-i mamandandyrylǵan mekeme. Onda balalar men jasóspirimder klýbtary jumys istep, bilim berý, oıyn-saýyq, sheberlik synyptary jáne basqa da sharalar ótkiziledi», - delingen aqparatta.
Kópbalaly jáne az qamtylǵan otbasylardyń balalary túgeldeı tegin jazǵy demalyspen qamtylady.
«Sondaı-aq bıyl alǵash ret «Qonaqjaı otbasy» atty pılottyq joba qolǵa alynyp otyr. Sonyń aıasynda balalar aýylǵa baryp, tildik ortaǵa enedi. Ol úshin Katonqaraǵaı aýdanyndaǵy Katonqaraǵaı, Órel jáne Berel aýyldary tańdap alynǵan», - delingen habarlamada.