ShQO-da 900-den astam sıntetıkalyq esirtki dozasy tárkilendi

ÓSKEMEN. QazAqparat - Shyǵys Qazaqstan oblysynda 900-den astam sıntetıkalyq esirtki dozasy tárkilenip, esirtkini jarnamalaýshylar toby jáne sıntetıkalyq esirtkini jetkizýshi ustaldy, dep habarlaıdy QazAqparat Polisia.kz saıtyna silteme jasap.

Shyǵys Qazaqstan oblysynyń polıtseıleri birqatar jedel-izdestirý is-sharalaryn júrgizdi, onyń nátıjesinde esirtkini nasıhattaý jáne jarnamalaýmen aınalysatyn eki adam, sondaı-aq sıntetıkalyq zattardy «qoıyp ketýdi» júzege asyrǵan er adam ustaldy.​

Turǵyn úı ǵımarattarynyń syrtyna esirtki taratýǵa qatysy bar ınternet-dúkender saıttarynyń attaryn jazý úshin Altaı aýdany Serebrıansk qalasyna arnaıy kelgen Semeı qalasynyń eki turǵyny anyqtaldy. Olar eshkimniń kózine túspeý úshin turǵyn úılerge saıt ataýlaryn táýliktiń qarańǵy ýaqytynda jazǵan. Polıtsııa qyzmetkerleri «jarnamashylardy» qylmys ústinde ustady, olardan boıaý ballondary tárkilenip alyndy.

Ustalǵandardyń aıtýy boıynsha, osyndaı graffıtı sýretterdi jazǵandary úshin olarǵa áleýmettik jeli arqyly sóılesken belgisiz adamdar belgili bir aqsha somasyn tóleýge ýáde etken. Endi tabystyń ornyna olarǵa qylmystyq jaýapkershilikke tartylý qaýpi tónip tur.