ShQO-da 9 myńǵa jýyq oqýshy mektep bitirdi

ÓSKEMEN. QazAqparat – Shyǵys Qazaqstan oblysynda bıyl 8859 oqýshy mektep bitirdi, dep habarlaıdy QazAqparat tilshisi.

ShQO Bilim basqarmasynyń málimetine súıensek, búgin óńir mektepterinde sońǵy qońyraý soǵyldy. Koronavırýs pandemııasyna qatysty karantın shekteýleriniń alynýyna oraı shara dástúrli formatta ótti.

«Bıyl 8 859 shyǵysqazaqstandyq oqýshy mektep bitirip otyr. Onyń ishinde Óskemende búgin 1 587 túlek úshin sońǵy qońyraý soǵyldy. Oblys boıynsha 7 510 oqýshy Ulttyq biryńǵaı testileýden ótedi. UBT tapsyrý rásimi 16 mamyrda bastalǵan. Osy jyldyń basty jańalyǵy – túlekterge eki ret emtıhan tapsyrýǵa múmkindiktiń berildi», - delingen aqparatta.

Óskemen qalasynda 138 oqýshy «Altyn belgige» úmitker. Attestattardy saltanatty túrde tapsyrý rásimi 16-17 maýsym kúnderine josparlanǵan.

Esterińizge sala ketsek, osyǵan deıin semeılik oqýshylardyń ǵylymı jobasy Reseıde ekinshi oryn alǵanyn habarlaǵan edik.