ShQO-da 8 myń adam qatysqan aýqymdy respýblıkalyq oqý-jattyǵý ótti

ÓSKEMEN. QazAqparat – Shyǵys Qazaqstan oblysynda «Qys-2021» respýblıkalyq komandalyq-shtabtyq oqý-jattyǵý ótti. Oqý-jattyǵýdy QR Tótenshe jaǵdaılar vıtse-mınıstri Marat Kúldikov basqardy, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, stsenarıı boıynsha kúnniń kúrt sýytýyna baılanysty muz qatyp, qaıyqtaǵy balyqshylar jaǵaǵa jete almaı qalǵan. Jol apatynan muzǵa qulap sý astyna ketip bara jatqan kólik te qutqarylýy tıis boldy. Sondaı-aq elektr jelilerinde aýqymdy avarııa bolǵan.

«Apat saldarynan elektr energııasyz qalǵan 32 myńnan astam abonent avarııalyq-tehnıkalyq jedel áreket etý brıgadasynyń kómegimen qaıtadan jaryq kózine qosyldy. Sý qubyry jáne káriz jelileri toby eń iri aýdandardyń biriniń qubyryndaǵy jarylysty qalpyna keltirdi. Al sýǵa batyp bara jatqan balyqshylarǵa MI-171 tikushaǵy kómekke jiberildi», - delingen aqparatta.

Apattar medıtsınasy ortalyǵynyń qyzmetkerleri barlyq zardap shekkenderge alǵashqy medıtsınalyq kómek kórsetti. Oqý-jattyǵýdy Qazaqstan Respýblıkasy Tótenshe jaǵdaılar vıtse-mınıstri Marat Kúldikov basqardy.

Aıta keteıik, oqý-jattyǵýǵa barlyǵy jeke quramnan 8 myńnan astam adam men 2,5 myńnan astam tehnıka jumyldyryldy.