ShQO-da «7-20-25» baǵdarlamasy boıynsha 1652 páter satylady

ÓSKEMEN. QazAqparat - Shyǵys Qazaqstanda «7-20-25» baǵdarlamasyna qatysýshylardan 300-ge jýyq ótinim túsken, dep habarlaıdy QazAqparat tilshisi.

Oblys ákiminiń baspasóz qyzmetiniń habarlaýynsha, turǵyndar tarapynan 2,6 mıllıard  teńgeniń ótinimi túsken. Qabyldanǵan ótinimderdiń 207-si maquldanyp otyr.

«Óskemen, Semeı, Rıdder, Kýrchatov qalalaryndaǵy jáne Ulan aýdany, Qaısenov kentindegi 1652 páter «7-20-25» baǵdarlamasy boıynsha satylýy múmkin. Ǵımarattardy «Nurly jer» baǵdarlamasynyń operatorlary salǵan. Jyl sońyna deıin taǵy 182 páter daıyn bolady» - deıdi qurylys basqarmasy basshysynyń orynbasary Syrym Dúsipov.

Bıyl óńirde oblystyq bıýdjet esebinen 15 áleýmettik nysannyń qurylysy júrip jatyr. Sonyń arqasynda Aıagóz qalasynda 600 oryndyq bir mektep, Úrjar aýdanynyń Maqanshy aýylynda 320 oryndyq taǵy bir mektep salyndy.  Sondaı-aq, Óskemendegi Kúlenov kentinde kúnine 212 adam qabyldaıtyn emhana qoldanysqa berildi. Abaı aýdanynyń Qaraýyl aýylynda basseın boı kóterdi.

Halyqty taza aýyzsýmen qamtý úshin quny 16,7 mıllıard teńgeniń 50 jobasy qolǵa alynǵan. Olardyń 48-i «Óńirlerdi damytý» baǵdarlamasy boıynsha, qalǵan ekeýi «Nurly jol» baǵdarlamasy boıynsha atqarylyp jatyr.

« 22 joba aıaqtalýǵa jaqyn. Qalǵan 28-i keler jylǵa aýysady. Osy jumystardyń nátıjesinde oblystaǵy ortalyqtandyrylǵan aýyzsýmen qamtylǵan turǵyndar úlesi 88 paıyzǵa jetpek» - deıdi energetıka jáne TÚKSh basqarmasynyń basshysy Murat Musataev.

Jyl sońynda Semeı qalasyndaǵy jáne Aıagóz, Jarma, Katonqaraǵaı, Kókpekti, Kúrshim, Tarbaǵataı, Úrjar aýdandaryndaǵy 9 myń turǵyn ortalyqtandyrylǵan sý júıesine qosylmaq.