ShQO-da 60-qa jýyq dáriger Túrkııa, Germanııa elderinde biliktilik arttyrady

<p>ÓSKEMEN. KAZINFORM — Shyǵys Qazaqstan oblysynda keler jyly 60-qa jýyq dáriger Túrkııa, Germanııa jáne Reseı elderinde biliktilik arttyrady.</p>

Shyǵys Qazaqstanda 2025 jyl — «Densaýlyq saqtaý» jyly dep jarııalandy. Bul týraly búgin oblys máslıhatynyń kezekti on toǵyzynshy sessııasy barysynda málim boldy. 

— 2024 jyl óńirde — «Jol jyly» bolyp jarııalanǵan. Sonyń barysynda 600 shaqyrym jol jóndeldi. Bul rekordtyq kórsetkish. Osy oń tájirıbeni jáne densaýlyq saqtaý salasy ınfraqurylymynyń qazirgi jaǵdaıyn eskere otyryp, 2025 jyldy «Densaýlyq saqtaý jyly» dep jarııalaý týraly sheshim qabyldandy, — dedi oblys ákimi Ermek Kósherbaev. 

Keler jyly bul salaǵa jumsalatyn qarjy kólemin ulǵaıtý josparlanyp otyr. Naqty aıtqanda, osy jylmen salystyrǵanda 1,7 ese artyp, 46 457,2 mln teńgeni quramaq.

Sondaı-aq, 21 densaýlyq saqtaý nysanyn kúrdeli jóndeýden ótkizý, 126 medıtsınalyq qural-jabdyq pen 36 jedel járdem kóligin satyp alý kózdelgen. Jyl kóleminde 57 dáriger Túrkııa, Germanııa, Reseı elderinde bilim alyp, 66 dáriger rezıdentýrada oqytylady.

Eske salsaq, osyǵan deıin ShQO-da JRVI juqtyrǵandar sany 17,7 paıyzǵa kóbeıgeni habarlanǵan.