ShQO-da 5 ga aýmaqta dalaly alqap janyp ketti

ÓSKEMEN. QazAqparat – Shyǵys Qazaqstan oblysynda sońǵy táýlikte shópti jáne qoqysty sharpyǵan 26 órt sóndirildi, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, 10 sáýir kúni óńir boıynsha 26 ret shóp jáne qoqys órtengen. Kóp jaǵdaıda qyzyl jalyn ashyq alańda shyqty.

«Eń iri dala órti Kókpekti aýdany Qulynjon men Belınskıı aýyldyq okrýgi arasynda bolǵan. Tilsiz jaýdyń jalpy aýdany 5 gektardy qurady. Kóp uzamaı ot tolyqtaı aýyzdyqtaldy», - dep habarlady vedomstvo ókilderi.

Órtti sóndirýge jeke quramnan 7 adam, jergilikti atqarýshy organdardan 2 tehnıka jáne orman sharýashylyǵynan 8 qyzmetker jumyldyrylǵan.

Osy rette, TJD mamandary azamattarǵa dalada órt qaýipsizdigi talaptaryn qatań saqtaý qajettigin eskertedi.