ShQO-da 400-den astam adamdy kene shaqty
ShQO Sanıtarııalyq-epıdemıologııalyq baqylaý departamenti baspasóz qyzmetiniń málimetine súıensek, óńirde kene shaqqandar sany kún saıyn artyp keledi. Keneniń taralý maýsymy sáýir aıynda bastalǵan.
Búginde barlyǵy 446 adam keneden zardap shekken. Onyń ishinde 144-i (33%) - 14 jasqa deıingi balalar.
«Kene shaqqan 423 adam ımmýnoglobýlın aldy. 23 adamǵa túrli sebeppen, atap aıtqanda medıtsınalyq uıymǵa tym kesh júginý jáne medıtsınalyq qarsy kórsetilimderge baılanysty ekpe salynbady. Jalpy oblys boıynsha kene ınfektsııasyna shaldyǵý deregi tirkelgen joq», - delingen aqparatta.
Aıta keteıik, Shyǵys Qazaqstan oblysy respýblıkada kene entsefalıtin juqtyrý qaýpiniń «joǵary» aımaǵyna jatady. Óńirde aýrýshańdyq deńgeıi Qazaqstan boıynsha ortasha kórsetkishten 4,1 ese joǵary.
Naýryz aıynyń aıaǵynan 9 sáýirge deıin óńirde 20 adamdy kene shaqqanyn jazǵan edik.