ShQO-da 36 myńǵa jýyq adamǵa vaktsına salynbaıdy

ÓSKEMEN. QazAqparat – Shyǵys Qazaqstan oblysynda 36 myńǵa jýyq adamda vaktsınaǵa qarsy medıtsınalyq kórsetilimderi bar, dep habarlaıdy QazAqparat tilshisi.

ShQO Densaýlyq saqtaý basqarmasynyń málimetinshe, 18 jasqa deıingi balalarǵa, júkti jáne bala emizip júrgen áıelderge, ekpe komponentterin kótere almaıtyndarǵa, sozylmaly jáne ınfektsııalyq aýrýlarǵa dýshar bolǵandarǵa vaktsına saldyrýǵa bolmaıdy.

«Búgingi tańda óńir boıynsha osyndaı sanattaǵylardyń sany 36,5 myń adamdy qurap otyr. Onyń ishinde 22 myń azamatta ekpege qarsy kórsetilimderi turaqty bolsa, 14,4 myń adamda ýaqytsha. Onkologııalyq aýrýlarǵa shaldyqqan 1570 jáne ımmýndyq tapshylyq aýrýy bar 244 naýqas ekpeden bosatylǵan. Al 693 adamda aýyr allergııalyq reaktsııa boldy», - delingen aqparatta.

Sondaı-aq oblystaǵy júkti jáne bala emizip júrgen 15 myńnan astam áıel ekpe almaıtyndardyń qataryna jatqyzylǵan.