ShQO-da 300 gektarǵa jaıylǵan taǵy bir dala órtiniń beti qaıtpaı tur
ShQO tótenshe jaǵdaılar departamenti baspasóz qyzmetiniń málimetine súıensek, 5 qyrkúıek kúni keshki ýaqytta shyqqan órt Kúrshim aýdanyndaǵy «Marqakól» orman sharýashylyǵyna, «Bobrovka» ormanshylyǵy men Tósqaıyń aýyldyq okrýgi aýmaǵyna jaıylǵan.
«Aldyn ala derek boıynsha jalpy aýdany 300 gektardy quraıtyn qyzyl jalyn aǵash, buta men shópti sharpyp jatyr. Eń jaqyn ornalasqan Tósqaıyń aýyly men ot oshaǵynyń arasy – 10 shaqyrym. Eldi mekenge eshqandaı qaýip tónip turǵan joq», - delingen habarlamada.
Qazirgi ýaqytta órt sóndirýshiler, ormanshylar, jergilikti atqarýshy organ ókilderi men polıtseıler oqıǵa ornynda tilsiz jaýmen kúresip jatyr. Barlyǵy 114 adam men 17 tehnıka jumyldyrylǵan. Sondaı-aq «Eýrokopter» jáne MI-2 tikushaqtary iske qosyldy. Óskemen qalasynan jeke quramnan 46 adam men 6 tehnıka kómekke kelip jetti.
Eske salsaq, buǵan deıin Shyǵys Qazaqstan oblysynyń Altaı aýdanynda iri dala órti shyqqanyn habarlaǵan bolatynbyz. Ol jaqta da órt ázirge aýyzdyqtalmaı jatyr.