ShQO-da 30 otbasy Tuńǵysh Prezıdent kúni qarsańynda baspanaly boldy

ÓSKEMEN. QazAqparat – Óskemen qalasynda Tuńǵysh Prezıdent kúni qarsańynda 30 otbasyǵa baspana berildi, dep habarlaıdy QazAqparat tilshisi.

Búgin Óskemendegi 30 otbasy qonys toıyn toılaýda. Olarǵa kópten kútken páter kiltterin ShQO ákimi Danıal Ahmetov saltanatty túrde tabys etti.

«Barshańyzdy kele jatqan Qazaqstan Respýblıkasynyń Tuńǵysh Prezıdenti kúnimen shyn júrekten quttyqtaımyn! Osyndaı jarqyn merekede baspanaly bolyp jatqan barlyq otbasylarǵa bereke-birlik tileımin. Qonys qutty bolsyn!», – dedi aımaq basshysy.

Otyz otbasynyń ishinde kópbalaly januıalar, balalar úıiniń tárbıelenýshileri, úı kezeginde turǵan basqa da áleýmettik osal toptaǵylar bar. Solardyń biri – jeńil atletıkadan Paralımpıada oıyndarynyń eki dúrkin júldegeri Olga Demchenko.

Al tórt balanyń anasy Merýert Muqusheva «balalarymnyń armany oryndaldy» deıdi.

«Búgin biz úshin qýanyshty kún. Páterimizdi kópten kúttik. Memlekettik baǵdarlamanyń arqasynda óz baspanamyzǵa qolymyz jetti», - dedi ol qýanyshyn jasyra almaı.

Aıta keteıik, bıyl shahardaǵy 200-den astam otbasy «Jaldamaly turǵyn úı», «Baqytty otbasy» baǵdarlamalary aıasynda baspanaly bolǵan.