ShQO-da 30-ǵa jýyq adamdy aldap soqqan alaıaq ustaldy
ShQO Polıtsııa departamenti baspasóz qyzmetiniń málimetine súıensek, tártip saqshylary óńir aýmaǵynda «Kontrafakt» jedel aldyn alý sharasyn júrgizdi. Mundaǵy maqsat – aqparattyq tehnologııalardy paıdalana otyryp jasalatyn qylmysqa, onyń ishinde ınternet-alaıaqtyqqa tosqaýyl qoıý.
Úsh kún ishinde polıtsııa qyzmetkerleri 14 qylmysty anyqtap, buryn jasalǵan 25 ınternet-alaıaqtyqty áshkereledi. Sondaı-aq zańsyz kontenti bar 40 saıt buǵattaldy.
«Máselen, shara barysynda polıtseıler Facebook jáne Instagram áleýmettik jelileri arqyly alaıaqtyqpen aınalysqan 28 jastaǵy oblys turǵynyn ustady. Ol azamattarǵa jarnama jasap beretindigine sendirip, aldyn ala tólem retinde aqsha suraǵan. Alaıda qarajat banktaǵy shotyna túskennen keıin habar-osharsyz ketti», - delingen aqparatta.
Kúdikti 30-ǵa jýyq adamdy aldap soqqan. Qazirgi tańda atalǵan fakti boıynsha QR Qylmystyq Kodeksiniń 190-baby 2-bóligine (Alaıaqtyq) sáıkes sotqa deıingi tergeý amaldary júrgizilip jatyr.