ShQO-da 27 jastaǵy áıel balasymen birge sýǵa batyp ketti

ÓSKEMEN. QazAqparat – Shyǵys Qazaqstan oblysy Altaı aýdanynda 27 jastaǵy áıel 8 jasar balasymen birge sýǵa batyp ketti, dep habarlaıdy QazAqparat tilshisi.

Altaı aýdandyq Tótenshe jaǵdaılar basqarmasynyń málimetine súıensek, qaıǵyly oqıǵa 29 maýsymda Maleevsk aýylyndaǵy ózende boldy. Bir top adam sý jaǵasyna demalý úshin barǵan.

«2013 jylǵy qyz abaısyzda sýǵa qulap túsken. Ony qutqarý úshin anasy ózenge sekirgen. Ókinishke qaraı, ekeýi de sýǵa batyp ketti. Oqıǵa ornyna kelip jetken qutqarýshylar birneshe saǵattan keıin áıeldiń denesin tapty», - dedi basqarma bastyǵynyń orynbasary Azamat Abdrahmanov.

Al qyzdyń máıiti 30 maýsymda tańerteń tabylǵan.

Osy rette, qutqarýshylar óńir jurtshylyǵyn jabdyqtalmaǵan jaǵajaılarda shomylmaýǵa shaqyrady.