ShQO-da 23 myńnan astam kópbalaly ana bar

ÓSKEMEN. QazAqparat - 9-10 aqpan kúnderi Shyǵys Qazaqstan oblysy boıynsha ótken «Jaqsylyq jasa» jáne «Júrekten - júrekke» aktsııalarynyń qorytyndysy jarııalandy, dep habarlaıdy QazAqparat tilshisi.

Demalys kúnderine dóp kelgen eki kúndik aktsııanyń alǵashqy nátıjelerin oblystyq densaýlyq basqarmasy men bilim basqarmasynyń ókilderi jarııalady. Oblystyq densaýlyq saqtaý basqarmasy basshysynyń orynbasary Raıfa Safıollanovanyń aıtýynsha, óńirde 23 myńnan astam kópbalaly ana bar. Al 320 myńnan qyz-kelinshek bar. Jyl saıyn bul sanattaǵy azamatshalardyń barlyǵy birneshe medıtsınalyq tekserýden tegin ótip otyrady.

«Medıtsınalyq mekeme mamandary kópbalaly jáne turmysy tómen otbasylarǵa únemi bas suǵyp, tegin qaraıdy. Qajet bolǵan jaǵdaıda densaýlyq saqtaý mınıstrligi bekitken tizimde kórsetilgen dári-dármektermen tegin qamtamasyz etedi. Jas bosanǵan analarǵa psıhologııalyq-profılaktıkalyq kómek beriledi» - deıdi Raıfa Safıollanova.

Al bilim basqarmasy basshysynyń orynbasary Qajymuqan Ospanǵalıev «Júrekten - júrekke» aktsııasy aıasynda 4 páterge qajetti jóndeý júrgizilgenin atady.

«Eriktiler qozǵalysyna tartylǵan Ulan aýdanynyń oqýshylary 3 otbasynyń páterine árleý jumystaryn jasap berdi. Al Semeı qalasyndaǵy elektr-tehnologııalyq kolledj ujymy men stýdentteri jylý batareıasy qatyp qalǵan páterge jańa júıe ornatyp berdi. Materıaldyq shyǵyn kolledjdiń bıýdjetten tys tabysy esebinen óteldi. Atalmysh aktsııanyń kelesi kezeńi Túlek.kz saıty arqyly júrgiziledi. Buǵan deıin muqtaj balalarǵa bastamashyl toptar óz usynystary boıynsha kómek kórsetse, endigi jerde balalardyń arman-tilekteri saıtqa qoıylady. Qamqorlyqqa nıetti jandar sol saıt arqyly ózi tańdaǵan balanyń tilegin oryndap berýge múmkindik alady» - deıdi basqarma ókili.

Qajymuqan Ospanǵalıevtiń aıtýynsha , 2018 jyly muqtaj balalardy qoldaý úshin jalpyǵa mindetti oqý qorynan 1,342 mlrd teńge bólingen. Bıyl 1,371 mlrd teńge bólinbek. Bul qarjyǵa kóp balaly jáne turmysy tómen otbasylardyń balalary mektepke qajet kerek-jaraq pen oqýshy formasyn, sporttyq kıimder men aıaqkıimderdi tegin alýda. Sondaı-aq, bul sanattaǵy oqýshylar atalmysh qor esebinen úıirmeler men jazǵy saýyqtyrý lagerlerine tegin barmaq.

«Bir ǵana Semeı qalasynda 49 bala jekemenshik balabaqshaǵa tegin barýǵa múmkindik aldy. Al kásibı-tehnıkalyq kollledjderge muqtaj otbasydan shyqqan túlekter birinshi kezekte qabyldanatyn boldy» - dedi Qajymuqan Ospanǵalıev.