ShQO-da 2022 jyly maıly daqyldardy óńdeıtin zaýyt salynady
ShQO Aqparat ortalyǵynyń málimetine súıensek, óńirde aýyl sharýashylyǵy salasy oń qarqynmen damyp keledi. Búginde aımaq kúnbaǵys tuqymyn óndirýde respýblıkada birinshi orynda tur.
«Semeı qalasy men Glýbokoe aýdanynda maı ekstratsııalaıtyn 2 iri zaýyttyń qurylysy júrgizilýde. Olardyń qýaty, sondaı-aq maıly daqyldar úshin alqaptardyń ulǵaıýy óńirdiń ósimdik maılarynyń san alýan túrlerin óndirýde memleket boıynsha kóshbasshy atanýyna jol ashady. Osy rette, biz arnaıy baǵdarlama ázirleımiz. Al kelesi jyly egistik alqaptarynyń qurylymyn túbegeıli ózgertýimiz kerek», - dedi oblys ákimi Danıal Ahmetov.
Onyń aıtýynsha, bıyl qaıta óńdeý zaýyty iske qosylyp, onyń táýliktik qýaty kúnbaǵys tuqymynyń ózinde ǵana myń tonnany quraıdy. Sondaı-aq 2022 jyly maıly daqyldardy óńdeıtin taǵy bir zaýyt iske qosylmaq.
«Oǵan dán jetispeýshiligi seziletindigi anyq. Demek, óńir sharýagerleri óz dánderin qaıda satamyn dep taban tozdyrmaıdy. Mundaı óndiris kólemimen paıdalanýǵa berilgennen keıin kásiporyndardyń jalpy qýaty jylyna 1,1 mıllıon tonnaǵa jetedi. Osylaısha, túgel aımaq joǵary sapaly ósimdik maılarymen qamtamasyz etilip qana qoımaı, ony eksportqa shyǵarýǵa da bolady. Bul rette, ásirese jaqyn kórshilerimiz Qytaı men Reseı Federatsııasy yntymaqtastyqqa qyzyǵýshylyq bildirip otyr», - dedi óńir basshysy.