ShQO-da 20 myńnan astam jumys orny quryldy
Óńirde ǵımarattardy qaıta jóndeý, jańa nysandar salý, kóshelerdi abattandyrý jumystary qarqyndy júrgizilýde. Bıyl Shyǵys Qazaqstanda 819 joba júzege asyrylyp, onyń 787-si osy jyldyń 1 jeltoqsanyna deıin aıaqtalmaq.
Bul jobalar qalalarmen qatar, aýdandar men shalǵaıdaǵy aýyldardyń damýyna oń áser etýde. Jańa ǵımarattar salynyp jatqan jerde jańa jumys oryndary ashylyp jatyr. Qarasha aıynda Jumyspen qamtý jol kartasy baǵdarlamasy boıynsha 27 jobany aıaqtaý qajet, – dedi óńir basshysy Danıal Ahmetov.
Alty iri joba, atap aıtqanda Óskemen qalasyndaǵy áýejaı, Úrjar aýylyndaǵy aerobekettiń ushý-qoný jolaǵyn qaıta jańartý, Semeıde Qaraǵaıly shaǵyn aýdanyna, Óskemendegi Esenberlın dańǵylynan Jibek joly kóshesine jáne Qazybek bı dańǵylynan Almaty trassasyna deıingi aralyqta ınjenerlik-kommýnıkatsııalyq ınfraqurylymdy salý, sondaı-aq Onkologııa jáne hırýrgııa ortalyǵynyń reanımatsııa, mammologııa jáne gınekologııa bólimsheleriniń operatsııalyq blogyn jańǵyrtý sııaqty jobalar kelesi jylǵa kóshiriledi.
Aıta keteıik, oblysta Jumyspen qamtý jol kartasy aıasynda 247 shaqyrym jol jóndelip, 14 aýrýhanada jáne 262 mektepte kúrdeli jóndeý júrgizildi. Barlyq negizgi jobalar, onyń ishinde kvartalishilik sý qubyry toraptary men kárizderiniń jáne 19 shaǵyn aýdannyń ınjenerlik-kommýnıkatsııalyq ınfraqurylymynyń qurylysy aıaqtalǵan. Semeı qalasyndaǵy kópirdi jaryqtandyrý jáne Abaı aýdany Qaraýyl aýylyndaǵy Abaı atyndaǵy saıabaqtyń qurylysy bitýge jaqyn.