ShQO-da 2 et óńdeý kásiporny salynýda
Agroónerkásiptik keshen oblys ekonomıkasyn damytýdyń jetekshi baǵyttarynyń bir. Óıtkeni óńir sút, kúnbaǵys maıy, bal jáne panty óndirisi boıynsha elimizde birinshi oryn, al et óndirisi boıynsha ekinshi oryn alady.
ShQO ákimi Danıal Ahmetov halyq aldynda esep berý barysynda osy salada júrgizilip jatqan jumystarǵa toqtaldy. Onyń aıtýynsha, ótken jyly aýyl sharýashylyǵyn damytýǵa 33 mlrd teńgeden astam qarajat bólingen. Sonyń nátıjesinde aýyl sharýashylyǵynyń jalpy ónim kólemi 116 paıyzǵa artyp, 686 mlrd teńgeni qurady. 5 sút qabyldaý pýnkti qurylyp, 1050 basqa arnalǵan 4 sút-taýar fermasy salyndy jáne 150 basqa arnalǵan 3 ferma qaıta jańartyldy.
«Sońǵy 5 jyl ishinde tartylǵan ınvestıtsııalar halyqtan sút satyp alýdy aqshalaı eseptegende 18 esege arttyrýǵa múmkindik berip otyr. Sondaı-aq 2015 jyldan bastap sút óńdeý kásiporyndarynyń qýaty 29 paıyzdan 87 paıyzǵa deıin ulǵaıdy. Mal sharýashylyǵy ónimderi kóleminiń ósýi óz kezeginde tamaq ónerkásibi kásiporyndary qýattylyǵyn arttyrýǵa yntalandyrady. Sondyqtan qýattylyǵy jylyna 19 myń tonnany quraıtyn eki et óńdeý kásipornynyń qurylysy júrgizilýde. Budan bólek, 7 myń bas iri qaraǵa arnalǵan 3 bordaqylaý alańy paıdalanýǵa berildi», - dedi aımaq basshysy.
Ótken jyly óńirde 774 myń tonna dándi daqyldar, 616 myń tonna maıly daqyldar jınaldy.
«Qazir Prezıdent Qasym-Jomart Toqaevtyń tapsyrmasy aıasynda, ósimdik sharýashylyǵyn damytý baǵdarlamasyna sáıkes tıimdiligi joǵary daqyldardyń alqaptaryn ulǵaıta otyryp, egistikterdi ártaraptandyrý júrgizilýde. Máselen, 2020 jyly soıanyń egis alqaby 1,3 myń gektarǵa, júgeriniń alqaby 2,2 myń gektarǵa ulǵaıdy. Búgingi tańda elimizde ósiriletin kúnbaǵys kóleminiń 66 paıyzy bizdiń oblysta ósiriledi», – dedi Danıal Ahmetov.