ShQO-da 1700-den astam úıge ýly gazdy anyqtaıtyn datchık ornatyldy
Óńirde jylytý maýsymy bastalǵaly beri jer úılerde 282 órt shyqqan. Bul jaıly baspasóz máslıhaty barysynda ShQO TJD bastyǵynyń orynbasary Dmıtrıı Tıtov málim etti.
«7 adam ıis tıip kóz jumdy. Bul byltyrǵy kezeńmen salystyrǵanda 22%-ǵa az. Jylytý maýsymynyń basynan qutqarýshylar 315 000-nan astam aýlany aralap, 537 935 adamǵa túsindirý jumystaryn júrgizdi. Sondaı-aq 80 915 úıde órt qaýipsizdigi erejeleriniń buzylǵandyǵy anyqtaldy», - dedi ol.
Osy rette, áleýmettik osal toptaǵy azamattarǵa erekshe kóńil bólinýde. Olardyń úılerin tekserý kezinde 5928 buzýshylyq anyqtalǵan.
«Qazmyrysh» JShS-men jasasqan memorandým aıasynda kópbalaly jáne az qamtylǵan otbasylardyń úılerine ýly gazdy anyqtaıtyn datchıkter ornatylýda. Búgingi tańda osy sanattaǵy januıalardyń úılerde 1708 datchık qoıyldy», - dedi Dmıtrıı Tıtov.