ShQO-da 17-20 jylǵa jetetin paıdaly qazbalar qory qaldy – mınıstr Myrzaǵalıev
«Óskemende Shyǵys Qazaqstan oblysy ákimi Danıal Ahmetovpen birge óńirdiń mıneraldyq-shıkizat bazasyn damytý boıynsha jıyn ótkizdik. Óńirden barlyq mıneraldyq shıkizat túri anyqtalǵan desek bolady. Altyn, kúmis, mys, tsınk, qorǵasyn, tıtan, barıt jáne jerasty sýlarynyń úlken qory Shyǵys Qazaqstanda shoǵyrlanǵan. Óńirde 17-20 jylǵa ǵana jetetin paıdaly qazbalar qory qaldy. Sondyqtan geologııalyq barlaý jumysy kólemin ulǵaıtýymyz qajet», - dep atap ótti mınıstr.
Maǵzum Myrzaǵalıevtiń sózinshe, bul baǵytta zamanaýı tehnologııa ádisterin qoldaný mańyzdy. Investorlarǵa qolaıly jaǵdaı jasaý arqyly úlken nátıjelerge qol jetkizýge bolady.
«Oblys ákimimen barlaýdy kúsheıtý, qosymsha qarjy tartý máselesi boıynsha jumys tobyn qurýǵa kelistik. Onyń quramyna saladaǵy ǵalymdar, kompanııalar men múddeli memlekettik organdar ókilderi kiredi. Jastardy geologııa salasyna tartyp, baýlý da asa mańyzdy. «Qazgeologııa» kompanııasy Shyǵys Qazaqstannyń jergilikti joǵary oqý oryndarymen áriptestikti kúsheıtedi»,- dep jazdy mınıstr.
Atap óteıik, Ekologııa mınıstri qazir jumys saparymen Shyǵys Qazaqstan oblysynda júr.