ShQO-da 130 shaqyrymdyq alaman báıge ótip jatyr

ÓSKEMEN. QazAqparat - Shyǵys Qazaqstannyń Zaısan aýdanynda 130 shaqyrymdyq alaman báıge bastaldy, dep habarlaıdy QazAqparat tilshisi.

Tańnan bastalǵan dúbirli jarysqa 33 júırik qosyldy. Arasynda elimizdiń batysyndaǵy Aqtaý qalasynan kelgen tulpar da bar. Zaısannyń Sátpaı aýylynan shyqqan sáıgúlikter Maıqapshaǵaı-Omby jolynyń boıymen batysty betke alyp, Tarbaǵataı aýdanynyń 65 shaqyrymdaǵy Baıtoǵas aýylynan keri qaıtady.

"Osyndaı alaman báıge ótetinin estip Óskemennen bir kún buryn jetkenbiz. Attar tańǵy saǵat 7.45-te jolǵa shyqty. 130 shaqyrym degen az emes. Kóktem- jýannyń jińishkerip, jińishkeniń úziler shaǵy. Onyń ústine jer de áli jibip bitken joq. Júırikterge naǵyz synaq bolaıyn dep tur. Ústindegi shabandozǵa de ońaı emes. Ázirge aldyńǵy top jelispen bastady. Ortasha jyldamdyq -25 km/ saǵat, - deıdi Myrzabek Tóken esimdi atqumar azamat.

Bas júldege 1 mıllıon teńge tigilip otyr.

-Mundaı báıge birinshi ret ótip jatyr. Sátti shyqsa, keler jyly áldeqaıda joǵary deńgeıde ótetin bolady, - deıdi uıymdastyrýshylardyń biri Qaırat Toqtasynuly.

Jarys qorytyndysy boıynsha 7-shi orynǵa deıin qomaqty júldeler tigilgen. Zaısannyń jurty Elbasy maqalasyndaǵy «Atqa miný mádenıeti» týraly oı-túıinnen keıin, osyndaı bastamaǵa bel býyp kirisken kórinedi.

Qaırat Toqtasynulynyń aıtýynsha, shabandoz márege shaýyp jete me, jelip nemese aıańdap bara ma - erik ózderinde. Maqsat - 130 shaqyrymdy toqtamaı júrip ótý jáne ozý.

Jarysta shabandoz aýystyrýǵa bolmaıdy. At pen shabandozdyń biri sharshap qalsa, báıgeden shettetiledi.