ShQO-da 130 myńǵa jýyq adam MÁMS júıesinde áli saqtandyrylmaǵan

ÓSKEMEN. QazAqparat – Shyǵys Qazaqstan oblysynda jyl basynan beri aýrýhanalar men dárigerlerdiń jumysyna qatysty 1300-den astam shaǵym tústi, dep habarlaıdy QazAqparat tilshisi.

Búginde oblys boıynsha 130 myńǵa jýyq adam MÁMS júıesinde saqtandyrylmaǵan. Bul týraly Áleýmettik medıtsınalyq saqtandyrý qory Shyǵys Qazaqstan oblystyq fılıalynyń basshysy Nurlan Kidirbaev málimdedi.

«Bul júıe 2020 jyldan beri jumys istep kele jatqanyna qaramastan áli de saqtandyrylmaǵan azamattar az emes. Jalpy óńir boıynsha saqtandyrylǵandar sany 617 061 adamdy quraıdy. Bul - Shyǵys Qazaqstan halqynyń 82,3 paıyzy», - deıdi ol.

Halyqty aqparattandyrý maqsatynda oblystyń qalalary men aýdandarynda jurtshylyqpen kezdesýler ótkizilýde. Osy jeltoqsan aıynda Ulan, Glýbokoe, Shemonaıha aýdandary, Altaı, Serebrıansk qalalary qamtylǵan.

«Jyl basynan beri turǵyndar tarapynan qor fılıalyna 29 500-ge jýyq ótinish kelip tústi. Onyń ishinde aýrýhanalar men dárigerlerdiń jumysyna qatysty 1 340 shaǵym jasalǵan. Ótinishterdiń basym bóligi, naqty aıtqanda 78,6%-y 1406 baılanys ortalyǵy arqyly túsken. Ár shaǵym boıynsha tekserý jumystary júrgizilip, tıisti shara qabyldandy», - deıdi Nurlan Kidirbaev.