ShQO-da 12 otbasy baspanaly boldy
2020 jyldan bastap Glýbokoe aýdanynda jańa úılerdiń qurylysy júrip jatyr. Qazirdiń ózinde 44 qospáterli 88 turǵyn úı kópbalaly jáne az qamtylǵan otbasylarǵa beriledi.
«Kópten kútken baspanamyzǵa qol jetkizdik. 2015 jyldan beri úı kezeginde turdym. Búgin aq túıeniń qarny jarylyp, qýanyshymyzda shek joq. Tórt balanyń anasymyn. Memleketten kópbalaly otbasylarǵa úlken qoldaý kórsetilip jatyr. Sondyqtan jergilikti ákimshilikke raqmetimdi aıtqym keledi», - dep ystyq lebizin bildirdi Abaı shaǵyn aýdanynyń turǵyny Áıgerim Namazbaeva.
Byltyr osy joba aıasynda 20 úı salynǵan. Onyń ishinde jeti úı Glýbokoe aýdanyna qarasty Beloýsovka, Bobrovka, Veselovka, Praporşıkovo jáne Cheremshanka aýyldaryndaǵy kópbalaly otbasylarǵa tabys etilgen. Bul úılerdiń árqaısysynda sharýashylyq júrgizýge arnalǵan 20 gektar jer ýchaskesi bar.
«Glýbokoe aýdynynda oblys ákimshiliginiń bastamasymen «Birqabatty Shyǵys» baǵdarlamasy damyp keledi. Bul úıler aýdan ákimi, aýdandyq máslıhat depýtattary men qoǵamdyq keńes músheleri jáne AMANAT partııasynyń qatań baqylaýynda. Úıdiń sapaly bolýy mańyzdy. Sonymen qatar aýdanda abattandyrý jumystary júrgizilip jatyr. Qazirdiń ózinde jaryqtandyrý jumystary júrgizilip, balalar alańy salynǵan. Jaqynda asfalt tóseledi», - dedi Glýbokoe aýdandyq máslıhatynyń tóraǵasy Altaı Qalıgojın.
«Birqabatty Shyǵys» memlekettik turǵyn úı baǵdarlamasynyń mehanızmi óte yńǵaıly. Merdiger óz qarajatyna baspana salyp, memleketke usynady. Barlyq tekserýden ótken soń memleket qarajat bólip, baspanalardy satyp alady. Keıinnen kezekte turǵan azamattar jergilikti atqarýshy organdar arqyly úılerge ıe bolady.
«Úı aýmaǵy – 85h65 sharshy metr. Úı gazabloktan salynǵan. Úıde barlyq jaǵdaı jasalǵan. Terezeler plastıkten, jerge lınoleým tóselgen. Úıdiń ishinde aqyldy pesh ornatylǵan. Qonystanyp jatqan turǵyndarǵa amandyq tileımin. Alǵan úıleri janǵa tolsyn. Salǵan úıimiz qýanysh alyp kelsin», - dep óz tilegin jetkizdi KTB qurylys kompanııasynyń dırektory Tilek Qońyrov.
Foto: ShQO aqparat ortalyǵy