ShQO-da 10 myńǵa jýyq bala birinshi synypqa bardy
Búgin Shyǵys Qazaqstandaǵy 343 mektepte 98 myń oqýshy úshin alǵashqy qońyraý soǵyldy. Onyń ishinde 9 654 bala mektep tabaldyryǵyn alǵash ret attap otyr.
«Barlyq mektepte saltanatty jıyndar men synyp saǵattary ótti. Jalpy oblys boıynsha apatty jáne úsh aýysymdy mektepter máselesi tolyqtaı sheshilgen. Búgingi tańda jańa bilim berý nysandaryn salýdaǵy negizgi maqsat – balalardy zamanaýı, jaıly jáne qaýipsiz ortada oqytý. 2023 jyly óńirde 4 200 oryndyq 11 mektep salý josparlanǵan. Olardyń jeteýi «Jaıly mektep» ulttyq jobasy aıasynda boı kótermek», - dep habarlady ShQO Bilim basqarmasynan.
Oqý jyly qarsańynda 70 mektepte ortasha, 7 bilim ordasynda kúrdeli jóndeý júrgizildi. Bıylǵy oqý jylynan bastap Shyǵys Qazaqstandaǵy bastaýysh synyp oqýshylary elimizdiń barlyq oblysyndaǵydaı tegin tamaqpen qamtamasyz etiledi.
«Osylaısha, óńirdiń 316 mektebinde 97 414 oqýshy ystyq tamaqpen, 27 mektepte 693 oqýshy býfettik tamaqpen qamtylady. Osy maqsattarǵa 1,7 mlrd teńge bólingen. Sonymen qatar 99 eldi mekendegi 4208 balany 128 avtobýs kúndelikti mektepke tasymaldaıdy. Onyń ishindegi 11 avtobýs osy jyly satyp alyndy», - delingen aqparatta.