ShQO bilim ordalarynda sybaılas jemqorlyqqa qatysty 11 qylmystyq is qozǵaldy
QR Sybaılas jemqorlyqqa qarsy is-qımyl Agenttiginiń ShQO boıynsha departamenti basshysynyń birinshi orynbasary Talǵat Bashev óńirdegi balabaqsha, mektep, kolledj dırektorlarymen kezdesti. Bul kezdesýdiń maqsaty – ata-analardan zańsyz aqsha jınaý faktilerine jol bermeý.
«Osy jyldyń 4 aıynda oblystaǵy bilim ordalarynda sybaılas jemqorlyqqa qatysty 11 qylmystyq is qozǵaldy. Al 2020 jyldan beri eseptegende osyndaı 58 qylmys tirkelgen. Keltirilgen zalaldyń jalpy somasy – 221 mln teńge. Búginde sonyń 83 mln teńgesi óndirildi», - deıdi Talǵat Bashev.
Onyń aıtýynsha, zań boıynsha ata-analardan múlde aqsha jınaýǵa bolmaıdy. Sondaı-aq balabaqsha, mektep, kolledj basshylyǵyna qarjylaı jáne zattaı syılyq berýge tyıym salynǵan.
Osyndaı faktilerge kýá bolyp jatqandarǵa 1424 jedel ortalyǵyna nemese QR Sybaılas jemqorlyqqa qarsy is-qımyl Agenttigi ShQO boıynsha departamentiniń 8(7232)-29-88-88 nómirine habarlasýǵa bolady.