ShQO bilim ordalarynda ata-analardan aqsha jınaý faktileri tirkelmedi
Búgin ShQO Aımaqtyq kommýnıkatsııalar qyzmetinde «Bilim berý mekemelerindegi zańsyz aqsha jınaýdyń aldyn alý sharalary» taqyrybynda baspasóz konferentsııasy ótti. Oblystyq Bilim basqarmasynyń basshysy Innesa Chernyshevanyń aıtýynsha, óńirdegi balabaqshalar men mektepterde sybaılas jemqorlyqqa jol bermes úshin keshendi jospar ázirlenip, tıisti sharalar qolǵa alynǵan.
«Jumys birneshe baǵyt boıynsha júrgizilip jatyr. Eń áýelgisi – túsindirý. Sonda bilim berý mekemeleriniń qyzmetkerlerine, ata-analarǵa zańnyń tarmaqtary aıtylyp, ony buzǵan jaǵdaıda qandaı jaýapkershilik kózdelgeni jetkiziledi. 2024 jyldyń basynan Óskemen qalasynda, Ulan, Zaısan, Shemonaıha, Altaı jáne Samar aýdandarynda bilim berý uıymdarynyń basshylaryna sybaılas jemqorlyqqa qarsy zańnamany túsindirý boıynsha semınarlar ótkizildi. 21 mamyrdan beri Óskemen qalalyq Bilim bóliminiń uıymdastyrýymen QR Sybaılas jemqorlyqqa qarsy is-qımyl agenttiginiń ShQO boıynsha departamenti basshysynyń birinshi orynbasary Talǵat Bashevtyń qatysýymen balabaqshalar, mektepter men kolledjderdiń dırektorlaryna sybaılas jemqorlyqqa qarsy saladaǵy Qazaqstan Respýblıkasynyń zańnamasyna engizilgen sońǵy ózgerister túsindirildi», - dedi ol.
Keshendi jospar sheńberinde Óskemendegi Y.Altynsarın atyndaǵy №39 orta mektepte, Sh.Ýálıhanov atyndaǵy №3 mektep-lıtseıde zańsyz aqsha jınaýdyń aldyn alý týraly ata-analar men muǵalimderge jınalys ótkizildi. Oqý oryndarynyń saıttarynda zańsyz aqsha jınaýǵa tyıym salatyn buıryq jarııalandy. Jalpy jyl saıyn qyrkúıek aıynda osy buıryq jańartylyp, muǵalimder men ata-analarǵa kórsetiledi. Sondaı-aq bilim berý uıymdarynda «Adal urpaq» erikti klýbtary men «Sanaly urpaq» stýdenttik klýbtarynyń jumysy uıymdastyrylǵan.
«Bilim týraly» QR Zańynyń 63-baby 1-tarmaǵyna sáıkes bilim berý uıymdarynda bilim alýshylar men tárbıelenýshilerge bıýdjet qarajaty esebinen kórsetiletin bilim berý qyzmetteri esh aqysyz kórsetiledi. Osy zańnyń 63-baby 2-tarmaǵyna sáıkes memlekettik bilim berý uıymdaryna jáne sharýashylyq júrgizý quqyǵyndaǵy memlekettik kásiporyndardyń uıymdyq-quqyqtyq nysanyndaǵy orta bilim berý uıymdaryna bilim alýshylar men tárbıelenýshilerge aqyly negizde bilim berý qyzmetterin kórsetýge, oqýshylar men muǵalimderden aqsha jınaýǵa qatań syıym salynǵan. Statıstıkalyq málimetterge sáıkes, 2021-2023 jyldar aralyǵynda Sybaılas jemqorlyqqa qarsy qyzmette Shyǵys Qazaqstan oblysy boıynsha bilim berý salasy qyzmetkerlerine qatysty 17 qylmystyq is qaralǵan. 2024 jyldyń basynan bilim ordalarynda ata-analardan aqsha jınaý faktileri tirkelmedi», - dedi ShQO Bilim basqarmasy uıymdastyrý jumysy jáne adam resýrstaryn basqarý bóliminiń bas maman-zańgeri Dosym Qaldybaev.
Onyń aıtýynsha, sybaılas jemqorlyq faktilerine kýá bolǵan muǵalimder nemese ata-analar 8(7232)-700-800 nómirine habarlasa alady.