ShQO áıelder túrmesinde Naýryz meıramynda analar men balalar qaýyshty

ÓSKEMEN. QazAqparat – Shyǵys Qazaqstan oblysyndaǵy OV-156/21 mekemesinde Naýryz meıramy erekshe atap ótildi, dep habarlaıdy QazAqparat tilshisi.

ShQO boıynsha QAJD baspasóz qyzmetiniń málimetine súıensek, Naýryz meıramy qarsanynda OV-156/21 mekemesinde «Ashyq esik» kúni ótti.

Búginde áıelder kolonııasynda 200-ge jýyq adam jazasyn ótep jatyr.

Bul kúni sottalǵandarǵa ata-analarymen jáne balalarymen kórisýge, erkin sóılesýge ruqsat etildi.

Kelýshiler úshin mekeme ákimshiligi kontsert pen ekskýrsııa uıymdastyrdy.

«Sottalǵandardyń týystary mekemeniń aýmaǵyna kirip, temir tordyń ar jaǵyndaǵy ómirmen jáne de bos ýaqyttarynda aınalysatyn jumystarymen tanysty. Naýryz meıramyna oraı sottalǵan áıelderge kúndelikti sur kıimderin sheship, merekelik, sándi ulttyq kóılekter kııýge ruqsat berildi. Sottalǵandar kontserttik baǵdarlama uıymdastyryp, án aıtyp, bı bıledi», - delingen aqparatta.

Merekelik sharanyń jalǵasy dalada qurylǵan kıiz úıde jalǵasty.

Áıelder de arqan tartýdan saıysqa tústi. Kıiz úıde mol dastarqan jaıylyp, áz-Naýryzdyń basty taǵamy – naýryz kóje men ystyq baýyrsaq usynyldy.

Qonaqtar dastarhannan bólek, úlken merekelik kontsert, qoldanbaly óner kórmeleri men baıqaýlardy tamashalap, ulttyq oıyndar oınady.

Jalpy Ashyq esik kúninde túzetý mekemesine 50-ge jýyq sottalǵannyń týystary men jaqyndary keldi.