ShQO aýyl mektebinde oqýshylar dene shynyqtyrý sabaǵyn dálizde ótkizýge májbúr
Bul týraly Kazinform tilshisine Mırolıýbovka aýylyndaǵy orta mekteptiń dırektory Janat Bolatbekqyzy aıtyp berdi.
«Mektebimiz 1971 jyly salynǵan. Qazirgi ýaqytta 72 oqýshy bilim alyp jatyr. Al shaǵyn ortalyqta 20 bala bar. Sport zalyna jóndeý jumystaryn júrgizý úshin byltyr tender jarııalaǵan edik. Tenderdi "MEGA-STR" JShS jeńip alyp, jazda sport zaldy jóndegen. Bólingen soma – 6 mln 880 myń teńge», - deıdi bilim ordasynyń dırektory.
Onyń aıtýynsha, jóndeý jumystarynyń sapasy syn kótermeıdi. Edenge tóselgen taqtaılardyń beti ústiriktelmeı, shegeleri shyǵyp tur.
«Bylqyldap turǵan eden aǵashtary qatty bassań synyp keterdeı. Munda dene shynyqtyrý sabaǵyn ótkizý óte qaýipti. «Jaman aıtpaı jaqsy joq» degendeı, erteń oqýshylar jaraqat alyp qalyp jatsa, kim jaýap beredi? Balalardyń densaýlyǵy bárinen de mańyzdy. Sondyqtan eki toqsan boıy dene shynyqtyrýdy dálizde ótkizdik. Qazir 3-shi toqsan bastaldy. Biraq ázirge kún sýyp ketkendikten oqýshylar qashyqtan oqyp jatyr. Túrli úıirmelerimiz bolatyn. Bári toqtap qaldy», - deıdi Janat Bolatbekqyzy.
Qazirgi ýaqytta mektep merdiger kompanııamen sottasyp jatyr.
Aldaǵy kúnderi memlekettik sáýlet-qurylys baqylaýy basqarmasynyń mamandary kelip, tekserý júrgizip, jóndeý jumystarynyń sapasyna baǵa bermek.
Sport zalyna tek oqýshylar ǵana bara almaı qalǵan joq, aptasyna birneshe ret osynda kelip voleıbol oınap, sportpen aınalysatyn jastarǵa da qıyn boldy.
Bári zaldyń tezirek jónge kelip, qaıta ashylǵanyn qalaıdy.