ShQO arhıvinen saıası qýǵyn-súrgin qurbandary jaıly 2,5 myń is qaraldy

ÓSKEMEN. QazAqparat – Shyǵys Qazaqstan oblysynyń arhıvterinen saıası qýǵyn-súrgin qurbandaryna qatysty 2 myńnan astam is qaraldy, dep habarlaıdy QazAqparat tilshisi.

ShQO ákimdiginiń málimetine súıensek, óńirde saıası qýǵyn-súrgin qurbandaryn ońaltý máseleleri jóninde arnaıy komıssııa qurylǵan.

Sonyń aıasynda jan-jaqty zertteý jumystary júrgizilip jatyr.

«Búgin halqymyz saıası qýǵyn-súrgin qurbandaryn eske alyp, olardyń ardaqty esimderin aza tutýda. Qasiretti kezeńdi bastan ótkerip, qanshama jazyqsyz jannyń japa shekkeni, myńdaǵan taǵdyrlardyń taptalǵany aşy shyndyq. Olardyń rýhyna qurmet kórsetýdi ár ýaqytta esten shyǵarǵan emespiz. Oblystaǵy komıssııanyń sarapshylary 2023 jyldyń 1 toqsanynyń qorytyndysy boıynsha 107 qordy zerdelep shyqty. Sonyń nátıjesinde saıası qýǵyn-súrgin qurbandaryna qatysty 2466 is qaraldy», - deıdi aımaq basshysy Danıal Ahmetov.

Onyń aıtýynsha, jas urpaq halqymyzdyń basyna túsken zulmat jyldar men Alash arystarynyń ardaqty esimderin bilýge mindetti.