ShQO: Altaı aýdanynda qar qalyńdyǵy 100 sm-ge jýyqtady
Óńir qutqarýshylary sý tasqyny kezeńine aldyn ala daıyndalyp jatyr. "Qazgıdromet" RMK ShQO fılıalynyń málimetinshe, qardyń eń kóp mólsheri Altaı aýdanynda túsken. Ondaǵy qar qalyńdyǵy - 96 sm. Al Marqakól aýdanynda - 81 sm, Rıdder qalasynda - 56 sm jetip otyr.
- Tarbaǵataı aýdanynda jer tońy - 87 sm, Samar aýdanynda - 75 sm, Zaısan aýdanynda - 66 sm quraıdy.
Shyǵys Qazaqstanda sý tasqyny qaýpi bar 71 eldi meken anyqtaldy. Onyń 15-inde qaýip tolyǵymen joıylyp, 49-ynda barynsha azaıtyldy. Qalǵan 7 eldi mekende qaýip áli joıylǵan joq. Olar Glýbokoe aýdany jáne Altaı aýdanynyń aýyldary, - dep habarlady ShQO Tótenshe jaǵdaılar departamentiniń baspasóz qyzmeti.
Sý tasqynyna qarsy jol kartasy sheńberinde 2023 jyly 5 shara iske asyrylǵan.
- Tótenshe jaǵdaı bolyp jatsa halyqty evakýatsııalaý úshin qalalar men aýdandardyń ákimderi jalpy syıymdylyǵy 8448 adamdy quraıtyn 91 ýaqytsha ornalastyrý pýnktin daıyndady. Jergilikti atqarýshy organdar men azamattyq qorǵaý qyzmetteri sapynan 2334 adam, 735 tehnıka, 50 júzý quraly jáne 223 motopompa ázirlengen, - delingen aqparatta.