ShQO ákimi Rıdderdegi jylý ortalyǵyndaǵy jaǵdaıdy túsindirdi

<p>ASTANA. KAZINFORM &mdash; Shyǵys Qazaqstan oblysynyń ákimi Ermek Kósherbaev Rıdder qalasyndaǵy jylý elektr ortalyǵyndaǵy jaǵdaıǵa qatysty túsinik berdi.</p>

«Rıdderde jumys atqarylyp jatyr. Jylý elektr ortalyǵyn bekitilgen merzimde jóndep, iske qosamyz», - dedi E. Kósherbaev Parlament palatalarynyń birlesken otyrysynyń aldynda tilshiler suraǵyna jaýap bere otyryp.

Onyń aıtýynsha, qalada jylý berý maýsymy qyrkúıek aıynyń ekinshi jartysynda bastalady.

«Jalpy, Shyǵys Qazaqstan oblysy aýmaǵynda kúzgi salqyn erte keletini belgili. Sondyqtan birqatar qalada jylý berý maýsymy erterek bastalýy múmkin. Rıdderde jylý berý kezeńinde problema bolmaıdy dep aıta alamyz», - dedi óńir ákimi.

Buǵan deıin Shyǵys Qazaqstan oblysy Rıdder qalasyndaǵy jylý elektr ortalyǵyndaǵy jóndeý jumystary qyrkúıektiń ortasynda aıaqtalyp, úılerge ystyq sý qosylatynyn jazǵan edik.

Eske salsaq, Rıdderdegi jylý elektr ortalyǵy «Óskemen jylý jelileri» aktsıonerlik qoǵamynyń quramyna qosyldy.