ShQO ákimi Úkimettegi málimet pen basqarmalar esebi nege bir-birine sáıkes kelmeıtinin synǵa aldy
Oblys ákimdiginde ótken jınalys barysynda jylytý maýsymyna daıyndyq jaıy talqyǵa salyndy.
Búginde bilim, densaýlyq saqtaý jáne áleýmettik-mádenı obektiler otynmen 100% qamtamasyz etilgen.
«Aldaǵy mańyzdy másele – qalalar men eldi mekenderdiń turǵyn úı sektoryn jylytý maýsymyna daıyndaý. Qyrkúıek aıynda kópqabatty úıler men ortalyq jylýǵa qosylǵan ǵımarattardyń daıyndyq pasporttary daıyn bolýy kerek. Bul jumys úshin ár ákim jeke jaýap beredi», - dedi ShQO ákimi Ermek Kósherbaev.
Óz sózinde ol basqarma basshylary men qala, aýdan ákimderine jasandylyqqa barmaı, shynaıy málimet berip otyrýǵa shaqyrdy.
«Sizder usynǵan málimetter shyndyqqa sáıkes kelmeı jatady. Buny ne úshin aıtyp otyrmyn? Sebebi Úkimet otyrysynda aıtylatyn sandar biz bergen aqparattarǵa uqsamaı jatatynyn birneshe márte baıqadym. Bálkim, keıde bizdiń málimetterdi jańartyp úlgermegen bolýy múmkin. Biraq oblysymyzda naqty, shynaıy aqparattar berilip, osy turǵydaǵy jumysty retke keltirý kerek», - dedi ákim.
Oblys ákimi qolastyndaǵylarǵa jylytý maýsymyna daıyndyq barysynda atqaratyn jumystarynyń naqty josparyn berýge tapsyrdy.
«Conda maǵan sizderdi baqylaý, al sizderge maǵan esep berý ońaı bolady. Áıtpese ylǵı «Jumysty mine qola alaıyn dep jatyrmyz» deı beresizder. Al sizder qolǵa alǵansha qys bastalyp qoıatyn boldy», - dedi Ermek Kósherbaev.
ShQO energetıka jáne turǵyn úı-kommýnaldyq sharýashylyq basqarmasynyń málimetinshe, jalpy óńir boıynsha kúz ben qys aılarynda halyq úshin – 447,5 myń tonna, bıýdjettik uıymdar úshin – 40,9 myń tonna kómir qajet.
Sondaı-aq ákimdikte Rıdderdegi jáne Óskemendegi jylý elektr ortalyqtarynda barlyq jóndeý jumystary keste boıynsha júrgizilip jatqany aıtyldy.