ShQO ákimi Nazarbaev ýnıversıtetindegi bolashaq mamandardy aımaqtaǵy ındýstrııalandyrýǵa atsalysýǵa shaqyrdy
Ákimmen bolǵan kezdesýge elordada bilim alyp júrgen 100-den astam úzdik shyǵysqazaqstandyq stýdentter qatysty. Jıyn barysynda elde Údemeli ındýstrııalyq-ınnovatsııalyq damý baǵdarlamanyń iske qosylǵanyn eske salyp ótken B. Saparbaev, «osy baǵdarlamaǵa sáıkes, Úkimet respýblıkanyń ındýstrııalyq kartasyn daıyndalǵandyǵyn, ol kartaǵa oblystan quny 600 mlrd. teńgeden astam somany quraıtyn 29 joba enip otyrǵandyǵyn» atap kórsetti.
Onyń aıtýynsha, byltyrdan beri 29 jobanyń ishinde quny 139 mlrd. teńge bolatyn 12 joba iske qosylyp úlgergen.
«Sonyń nátıjesinde jańadan 1,5 myńnan astam jumys oryndary ashyldy. Jalpy qazirgi tańda oblystyń ekonomıkalyq damýy respýblıka deńgeıinen tómen emes. Jańadan ashylyp jatqan kásiporyndar bar. Sonyń barlyǵy jańa mamandardy kútedi. Indýstrııalyq baǵdarlamany oryndaý úshin, jańa kásiporyndarǵa zamanaýı tehnologııany engizý úshin ózderińiz sııaqty halyqaralyq deńgeıde JOO bitirgen mamandar kerek»,-dedi B. Saparbaev.
«Biz, oblys basshylyǵy jas mamandarǵa jaǵdaılar jasaımyz. Eń birinshi ol árıne páter máselesi, jol shyǵyndary, alǵashqy ýaqyttaǵy turmys úshin beriletin qarjylar bizdiń oblystyq jáne respýblıkalyq bıýdjetten qaralady. Biz sizderge senemiz, sizderdiń týǵan jerlerińiz sizderdi kútedi»,-dep atap ótti oblys basshysy.
Nazarbaev ýnıversıtetinde 500-ge tarta tálimgerdiń 39-y - ShQO-dan. Jalpy Astanada Shyǵys Qazaqstan oblysynan 854 stýdent oqyp jatyr. Sonyń 220-sy úzdik bilim kórsetip júr. «Bul biz úshin úlken maqtanysh», - deıdi B. Saparbaev.
Oblys basshysynyń aıtýynsha, óńir halqynyń 60 paıyzynda joǵary nemese arnaýy orta bilimi bar. Sondyqtan ákim jas mamandardy Shyǵys Qazaqstan oblysyna kelip, ındýstrııalandyrý kartasy aıasyndaǵy jobalarda jumys isteýge shaqyrdy.