ShQO ákimi: Bıýdjetti bos shyǵyndamas úshin ár mektepke naqty qandaı jóndeý kerektigin anyqtaımyz
Aımaq basshysy qala jáne aýdan ákimderimen, bilim basqarmasynyń mamandarymen jınalys ótkizdi. Kún tártibinde mektepterdi kúrdeli, aǵymdaǵy jóndeý baǵdarlamasyn iske asyrý jáne jańa jabdyqtar satyp alý máselesi qaralǵan.
«Búgingi tańda óńirde 644 bilim berý mekemesi jumys isteıdi. Olardyń keıbireýleri jóndeýdi qajet etedi. Alaıda qalalar men aýdandardyń ákimderi naqty ne isteý kerektigin túsiný úshin ár mektepke komıssııalyq tekserý júrgizilýi qajet», - dedi Danıal Ahmetov.
Onyń aıtýynsha, osylaısha barlyq qurylys jáne jóndeý jumystary naqtylanady.
«Bul bıýdjetti únemdi jumsaý jáne qajetti jóndeýdiń smetalyq qunynan asyp ketýine jol bermeý úshin jasalady. Óz kezeginde biz orta bilim berý obektileriniń barlyq rastalǵan qajettilikterine qarajat bólemiz», - dedi oblys ákimi.