«Shıveet ýlaan» ǵuryptyq keshenine júrgizilgen zertteýler nátıjesi jarııa etildi

ASTANA. QazAqparat - Búgin elordada Mońǵolııadaǵy kóne túrkilerdiń «Shıveet ýlaan» ǵuryptyq keshenine júrgizilgen «Táńirtaýdan Ótúkenge deıin: Uly dala kóshpelileriniń tarıhı-mádenı qazynalary» atty ІІ halyqaralyq ekspedıtsııanyń ǵylymı jańalyqtary men qorytyndy nátıjeleri jurtshylyq nazaryna usynyldy,  dep habarlaıdy QazAqparat. 

«Mońǵolııanyń ortalyq aýdanynda ornalasqan «Shıveet ýlaan» dep atalatyn asa iri ǵuryptyq keshen bar. Osy keshende arheologııalyq zertteý, jalpy qurylym bitimin anyqtaý maqsatynda birlesken ekspedıtsııa 2 aı boıy qazba jumystaryn júrgizdi. Basty maqsatymyz qorymnyń qurylym-bitimin anyqtaý boldy. Óıtkeni, bul kóne túrki dáýiriniń bitim-bolmysy jaǵynan qaıtalanbaıtyn erekshe kesheni. 60-tan astam tańbasy, 30-ǵa jýyq tas músinderi bar, taýdyń tóbesinde, eki ózenniń qıylysynda ornalasqan», -  dedi ekspedıtsııaǵa qatysqan qazaqstandyq ǵalym Nápil Bazylhan.

Onyń aıtýynsha, keshen qurylysynyń jalpy kólemi 120*45 metrdi quraıdy. Jalpy qurylymy taspen qalanǵan, tórtburyshty sozylyńqy pishindi 11 kishigirim munaraly qamal qabyrǵalardan qurylǵan. Munan bólek, bas qurylystyń 8 qyrly bóliginiń tórtburysh tekshe irgetasty bolǵany anyqtalǵan. Arheologııalyq zertteý barysynda 9 adam beıneli, 4 jyrqysh ań beıneli, 1 qozyly qoı beıneli, 3 qoshqar beıneli tas músinder tabylǵan.

Aıta keterligi, bul ekspedıtsııaǵa Túrki akademııasy halyqaralyq uıymy tarapynan qoldaý   kórsetildi. Sondyqtan búgingi shara barysynda Túrki akademııasynyń prezıdenti, «Egemen Qazaqstan» respýblıkalyq gazeti basqarmasynyń tóraǵasy Darhan Qydyráli ǵalym Nápil Bazylhan men ekspedııaǵa qoldaý kórsetken Túrkııa Úkimeti janyndaǵy Túrik yntymaqtastyq jáne úılestirý agenttiginiń Astanadaǵy ókili Adı Ihsan Chaǵlardy  akademııanyń «Túrki dúnıesiniń yqpaldastyǵy men damýyna jáne túrkitanýlyq zertteýlerge qoldaý kósretkini úshin» qurmet gramotasymen marapattady.