ShYU – strategııalyq maqsattarǵa jetýdiń negizgi quraly – Prezıdent keńesshisi
«ShYU – strategııalyq maqsattarǵa jetýdiń negizgi quraldarynyń biri bolyp qala beredi. ShYU-ǵa múshe elder ekonomıka jáne qaýipsizdik salasynda aıtarlyqtaı nátıjelerge qol jetkize otyryp, bilim berý salasyndaǵy yntymaqtastyqty jandandyrýǵa nıetti. ShYU-ǵa múshe elder arasynda bilim salasyndaǵy yntymaqtastyqty ilgeriletý maqsatynda 2008 jyly «ShYU ýnıversıtetin qurý týraly» tujyrymdama usynyldy. Ol ShYU-ǵa múshe elderdiń joǵary oqý oryndarynan turýy tıis jelilik ýnıversıtet. ShYU ýnıversıteti – bul tarıhta alǵash ret ekonomıkalyq áleýeti ártúrli jáne ózindik bilim berý júıesi bar elder qurǵan jelilik joǵary oqý orny. Halyqaralyq ǵylymı yntymaqtastyq ǵylym men bilimdi damytý men bólisýdiń eń tıimdi ádisteriniń biri jáne zertteýshilerdiń ǵylymı yqpalynyń ósýine túrtki bolady», - dedi Bolat Aqsholaqov elordada ótip jatqan «Joǵary bilim berý jáne óndiristi ıntegratsııalaý salasyndaǵy yntymaqtastyq» atty halyqaralyq sımpozıýmda.
Prezıdent keńesshisiniń pikirinshe, joǵary bilim berý jáne óndiristi ıntegratsııalaý salasyndaǵy yntymaqtastyq taqyrybynda halyqaralyq sımpozıýmyn ótkizý ShYU-ǵa múshe elder arasynda ǵylymı jáne mádenı is-qımyldy arttyrýǵa úlken serpin beredi. Sonymen qatar atalǵan is-shara bilim berý qyzmetteriniń jahandyq naryǵynda joǵary oqý oryndarynyń básekege qabilettiligin arttyrýǵa mol múmkindik.
«HHІ ǵasyr – ınnovatsııalar, zamanaýı tehnologııalar jáne osy salalardy zertteýler zamany. Búgingi mindet – stýdentter men ǵalymdar ázirlegen ǵylymı jobalar men ıdeıalardy ilgeriletý jáne onyń adamzatqa qyzmet etýin qamtamasyz etý. Árıne, ár ýnıversıtettiń ózindik mádenıeti, ózindik bilim berý stıli bar ekenin túsinemiz. Degenmen yntymaqtastyq jáne birlesip zertteý jumystaryn júrgizý arqyly adamzat irgeli ǵylymnyń qoldanbaly ǵylymǵa aınalýyn qamtamasyz etýi múmkin», - deıdi ol.
Buǵan deıin QR Prezıdentiniń keńesshisi Bolat Aqsholaqov ShYU sammıti jáne uıymǵa múshe elder arasynda ǵylym men joǵary bilimdi damytýǵa qatysty pikir bildirgen edi.
Búgin elordadaǵy Astana IT ýnıversıtetinde «Joǵary bilim berý jáne óndiristi ıntegratsııalaý salasyndaǵy yntymaqtastyq» degen ataýmen halyqaralyq sımpozıým ótip jatyr. Oǵan QHR Bilim mınıstri Hýaı Tszınpen, QR Ǵylym jáne joǵary bilim mınıstri Saıasat Nurbek, Jibek joly ýnıversıtetteri alıansynyń hatshylyǵy, Ál-Farabı atyndaǵy Qazaq ulttyq ýnıversıtetiniń Basqarma Tóraǵasy – Rektory Janseıit Túımebaev, Sıan Tszıaotýn ýnıversıtetiniń rektory Chjan Lıtsıýn, Astana IT ýnıversıtetiniń rektorynyń mindetin atqarýshy Serik Ómirbaev jáne 20 joǵary oqý ornynyń rektory qatysty.