ShYU-nyń Astana deklaratsııasynda beıbit álemdi damytý formýlasy usynylady – sarapshy pikiri

<p>ASTANA. KAZINFORM &ndash; ShYU-nyń Astana deklaratsııasynda beıbit álemdi damytý formýlasy usynylady. Mundaı pikirdi eloradada ótip jatqan ShYU sammıti aıasynda sarapshy Baýyrjan Serikbaev bildirdi.</p>

«Sammıttiń mańyzy óte joǵary. Ony qatysýshy memleketterdiń saıası salmaǵynan jáne BUU Bas hatshysynyń arnaıy qatysýynan-aq túsinýge bolady. Іs-sharaǵa 15 eldiń basshylary, álemnen 10 myńǵa jýyq delegat, sondaı-aq halyqaralyq uıymdardyń jetekshileri keldi. Sammıttiń taǵy bir erekshelegi – Qazaqstannyń 1 jyl boıy atqarǵan tóraǵalyǵynyń qorytyndysy. 1 jyldyń ishinde elimizdiń tóraǵalyǵymen 100-ge jýyq is-shara uıymdastyryldy. Bir-eki mysalǵa toqtalsam, Túrkistan qalasynda ShYU-ǵa múshe memleketterdiń mádenı ortalyqtaryn, tarıhı qalalaryn zerdeleý aıasyn keńeıtýge baǵyttalǵan ǵylymı-zertteý konferentsııasy ótti. Ekologııa máselesi de, azyq-túlik qaýipsizdigi de kóterildi. Álemde jyl saıyn qýańshylyq artyp keledi. Aýyz sýdyń jetispeýshiligi de baıqalady. Sý tasqyny da álemniń túkpir-túkpirinde oryn alyp jatyr. Osy oraıda azyq-túlik máselesin sheshý úshin Qazaqstan naqty basymalaryn kóterip otyr», - dedi sarapshy agenttik tilshisine bergen suhbatynda.

Sonymen qatar ol búgin elordada ótip jatqan sammıtte Astana deklaratsııa qabyldanatyndyǵyn aıtty.

«Qujatta ShYU atynan beıbit álemdi damytýǵa baılanysty belgili bir formýla usynylady. ıAǵnı, búginde, geosaıası teketirester ártúrli alańda bolyp jatqan kezde ShYU álemdi beıbit damytý maqsatynda óziniń resmı kózqarasyn bildiredi degen sóz», - dedi ol.

Sonymen qatar sarapshy Belarýs eli 2022 jyly ShYU-ǵa múshe bolýǵa ótinish bildirgenin eske saldy.

«3 jyldan keıin búgin mine Belarýs tolyqqandy múshe bolyp otyr. Demek, Uıymnyń geografııalyq aımaǵy da keńeıe tústi. Menińshe, keshke deıin áli de mańyzdy málimdemelerge, qujattarǵa qol qoıý rásimine kýá bolamyz», - dedi Baýyrjan Serikbaev.

Aıta keteıik, elordadaǵy Táýelsizdik saraıynda Qazaqstan tóraǵalyǵymen Shanhaı yntymaqtastyq uıymynyń sammıti bastaldy.

Qazaqstan Prezıdenti Qasym-Jomart Toqaev ShYU sammıtine kelgen mártebeli meımandardy qarsy alyp, qol alysty. El basshylaryn qarsy alý rásimi aıaqtaldy.

Belarýs ShYU-nyń tolyqqandy múshesi boldy. Shanhaı yntymaqtastyq uıymynyń sammıtinde múshe memleketterdiń basshylary Belarýs Respýblıkasyn Uıym múshelegine qabyldaýǵa qatysty birqatar qujatqa qol qoıdy.

Shanhaı yntymaqtastyq uıymy halyqaralyq qatynas júıesiniń mańyzdy tetigine aınaldy. Bul týraly sammıtte Memleket basshysy Qasym-Jomart Toqaev aıtty.