ShYU-ǵa áskerı saladaǵy senim sharalary týraly kelisimdi qabyldaıtyn ýaqyt keldi – Qasym-Jomart Toqaev

<p>ASTANA. KAZINFORM &ndash; Memleket basshysy Qasym-Jomart Toqaev Shanhaı Yntymaqtastyǵy Uıymynyń Astana sammıtinde sóılegen sózinde &laquo;Shanhaı ondyǵyna&raquo; kiretin elder úshin strategııalyq mańyzy bar basty baǵyttarǵa toqtaldy.</p>

«Qazirgi kúrdeli ahýal – negizinen halyqaralyq qatynastar júıesindegi daǵdarys saldary. Osy rette halyqaralyq quqyqtyń kemshin tustaryn túzep, geosaıası turǵydan jikke bólinýge jol bermeý maqsatymen, túptep kelgende, jahandyq aýqymdaǵy beıbitshilik pen qaýipsizdikti nyǵaıtý úshin ShYU óziniń turaqtandyrýshy jáne jasampazdyq rólin kúsheıtýge tıis», – dedi Prezıdent.

Prezıdenttiń aıtýynsha, Shanhaı yntymaqtastyq uıymynda búkil Eýrazııa qurlyǵyndaǵy beıbitshilik pen qaýipsizdikti qamtamasyz etýge kepil bolatyndaı aıryqsha múmkindikter bar. Uıymǵa múshe memleketterge «Ádil álem, kelisim jáne damý jolyndaǵy jahandyq birlik týraly» ShYU bastamasyn júzege asyrý dál osy maqsatpen usynylyp otyr.

Memleket basshysy Áskerı saladaǵy senim sharalary týraly kelisimdi ázirlep, qabyldaıtyn ýaqyt kelgenin aıtty. Bul rette «Úsh zulym kúshpen» kúres máselesi árdaıym jiti nazarda bolýǵa tıis ekeni de aıtyldy.

Qasym-Jomart Toqaev kıberqaýipsizdikti kúsheıtý Uıymǵa múshe elderge ortaq taǵy bir mańyzdy mindet ekenine nazar aýdardy. Sondaı-aq, Prezıdent ShYU-ǵa múshe memleketterdegi aqparattyq ınfraqurylymnyń turaqty jumysyn qamtamasyz etý úshin udaıy aqparat almasýǵa, úzdik tásilder men ozyq tájirıbelerdi qoldanýǵa baǵyttalǵan arnaıy mehanızm ázirleýdi usyndy.