ShYU elderiniń birligin arttyrýda BAQ-tyń róli zor – Shen Haısıýn
Áýeli sóz alǵan Qytaı medıa korporatsııasynyń basshysy Shen Haısıýn qazaq-qytaı dostyǵyn nyǵaıtýdyń mańyzdylyǵyna toqtaldy.
«Eki eldiń BAQ ókilderiniń ózara pikir almasyp, tájirıbemen bólisýi jarqyn bolashaqty qalyptastyra túsetini anyq. Qazaq jáne qytaı halyqtarynda birlik týraly ortaq maqaldar kóp. Bul rette, aqparat keńistigindegi yntymaqtastyqty arttyrý arqyly qos eldiń dostyǵyn baıandy etý túsý múmkindigi mol. Jalpy, biz ShYU elderin biriktirý úshin birlesken kúsh-jiger jumsaýǵa daıynbyz. Uıymǵa múshe elderdiń BAQ ókilderi ádil, obektıvti, pozıtıvti jáne salaýatty jahandyq qoǵamdyq pikir qalyptastyrý úshin jumyla jumys isteýimiz kerek», - dedi Shen Haısıýn.
QR Mádenıet jáne aqparat vıtse-mınıstri Qanat Ysqaqov álemde turaqsyz geosaıası jaǵdaı saqtalǵan ýaqytta BAQ-tyń shynaıy aqparat taratýy mańyzdy ekenin eske saldy.
«Osy oraıda, Qazaqstan-Qytaı BAQ ókilderiniń bir-birimen tolymdy aqparatpen almasýyna bar jaǵdaı jasalýǵa tıis. Osylaısha, eki eldiń turǵyndary kez kelgen saladaǵy sońǵy ári sapaly, bastysy shynaıy aqparatpen qamtamasyz etiledi. Qaı kezde bolmasyn BAQ róli erekshe. Qos eldiń arasyndaǵy medıa áriptestik odan ári jandana túsetinine senim mol. Jalpy, ShYU elderiniń aqparat agenttikteri arasyndaǵy yntymaqtastyqty tereńdetý óte mańyzdy», - dedi Qanat Ysqaqov.
ShYU-nyń burynǵy Bas hatshysy Vladımır Norov ShYU elderi BAQ ókilderiniń birlesken belsendi jumysy nátıjesinde Astanadaǵy sammıt álemdik kóshbasshylardyń nazaryn aýdartqanyn atap ótti.
«Jyl saıynǵy halyqaralyq forýmda ShYU-ǵa múshe elderdiń basshylary eýrazııalyq keńistikte beıbitshilikke, qaýipsizdikke jáne turaqty damýǵa birlesip kúsh salady. ShYU Qazaqstannyń tóraǵalyǵymen jahandyq qaýipsizdik pen damý máselelerin sheshýde aıtarlyqtaı tabystarǵa qol jetkizdi», - dedi ol.
ShYU-nyń taǵy bir burynǵy Bas hatshysy Bolat Nurǵalıev ShYU elderiniń aqparat agenttikteri arasyndaǵy yntymaqtastyqty tereńdetý bastamasy quptarlyq is ekenin jetkizdi.
«23 jyl qyzmet etip kele jatqan bul uıym ózin tolyǵymen tıimdi memleketaralyq birlestik retinde kórsete bildi. ShYU óz maqsatyn aıqyn oryndap, saıası, ekonomıkalyq jáne gýmanıtarlyq ólshemderdegi ártúrli ózara is-qımyldy qamtamasyz etedi», - dedi B. Nurǵalıev.
Kezdesý qorytyndysy boıynsha qatysýshylar Qytaı medıa korporatsııasy men ShYU elderiniń BAQ arasyndaǵy pragmatıkalyq yntymaqtastyqty tereńdetý bastamasyn usyndy.