ShYU elderi Qaýipsizdik keńesteri hatshylarynyń otyrysy ótedi - SІM

<p>ASTANA. KAZINFORM &ndash; Shanhaı yntymaqtastyq uıymyna múshe memleketter Qaýipsizdik keńesteriniń hatshylary elordada bas qosady. Bul týraly Syrtqy ister mınıstrliginiń resmı ókili Aıbek Smadııarov aıtty.&nbsp;</p>

2024 jylǵy 2-3 sáýirde Astana qalasynda Shanhaı yntymaqtastyq uıymyna múshe memleketterdiń Qaýipsizdik keńesteri hatshylarynyń 19-kezdesýi ótedi. Aldaǵy is-shara Qazaqstannyń tóraǵalyǵymen ótedi jáne uıymǵa tolyqqandy múshe memleket retinde alǵash ret Iran qatysady. Uıymnyń baqylaýshy memleketteri – Mońǵolııa men Belarýs qonaq retinde shaqyryldy. Osy kezdesý aıasynda uıymnyń jaýapkershilik aımaǵynyń ózekti halyqaralyq máseleleri boıynsha, onyń ishinde «úsh zulymdyq kúshterine» (terrorızm, separatızm, ekstremızm), esirtki quraldary men psıhotroptyq zattardyń zańsyz aınalymyna, transulttyq uıymdasqan qylmysqa birlese qarsy turý jáne halyqaralyq aqparattyq qaýipsizdik baǵyty boıynsha yntymaqtastyq, sondaı-aq Birikken Ulttar Uıymy, Azııadaǵy ózara is-qımyl jáne senim sharalary jónindegi keńes, Ujymdyq qaýipsizdik týraly shart uıymy sııaqty kópjaqty birlestikter sheńberindegi odan ári árekettestik boıynsha pikir almasý josparlanǵan», - dedi resmı ókil.

Onyń aıtýynsha, is-sharanyń qorytyndysynda uıymǵa múshe memleketterdiń Qaýipsizdik keńesteri hatshylarynyń kezdesý hattamasyna qol qoıý josparlanǵan. Onda múshe memleketterdiń óńirlik jáne halyqaralyq qaýipsizdik máseleleri boıynsha kópjaqty áriptestikti odan ári damytýǵa ortaq kózqarastary kórsetiledi.

«Aldaǵy kezdesý tutastaı alǵanda qaýipsizdik pen turaqtylyq salasyndaǵy óńirlik áriptestikti qamtamasyz etý boıynsha Qazaqstannyń uzaq merzimdi múddelerine saı keledi jáne ShYU aıasyndaǵy Qazaqstannyń kópjaqty yntymaqtastyǵynyń deńgeıin arttyrýǵa, sondaı-aq óńirdegi negizgi áriptestermen syn-qaterlerge qarsy is-qımyl salasyndaǵy tyǵyz saıası dıalogqa baǵyttalǵan», - dedi Aıbek Smadııarov.