ShYU elderi ǵylymı granttar baǵdarlamasyn iske qosady

<p>ASTANA. KAZINFORM &ndash; ShYU-ǵa múshe elderdiń bilim jáne ǵylym mınıstrleriniń kezdesýinde bólek qarjylandyrý esebinen birlesken ǵylymı granttar baǵdarlamasyn iske qosýǵa kelisti.</p>

Jyl sońyna qaraı barlyq qajetti qujattar daıyndalyp, birlesken ǵylymı zertteýler úshin alǵashqy granttar jarııalanady. Bul týraly Ǵylym jáne joǵary bilim mınıstri Saıasat Nurbek málim etti. 

«Úlken nátıjege qol jetkizý úshin kúsh biriktirý kerek. Birneshe kún buryn bizdiń Prezıdent «Ǵylym jáne tehnologııalyq saıasat týraly» jańa zańǵa qol qoıdy. Keıinirek bul zań týraly egjeı-tegjeıli aıtatyn bolamyz. Biz alǵash ret salyqtyq preferentsııa tetigin engizip otyrǵanymyz. Endi, jeke ónerkásiptik uıym ınnovatsııaǵa ınvestıtsııa salsa jáne bizdiń ǵylymı ınstıtýttarmen yntymaqtastyqta jumys istese, onda 150%-ǵa deıin salyq arqyly shegerimder ala alady jáne ony kelesi jyly 300%-ǵa jetkizemiz. Bizdiń mindet – ǵylymdy qajet etetin ónimge ınvestıtsııa salý úshin jeke kompanııalarǵa tartymdy jaǵdaı jasaý», - dedi Saıasat Nurbek elordada ótip jatqan «Joǵary bilim berý jáne óndiristi ıntegratsııalaý salasyndaǵy yntymaqtastyq» atty halyqaralyq sımpozıýmda. 

Mınıstrdiń málimdeýinshe, ǵylym qorynyń fýnktsııalary qaıta qaralady. Qor qarapaıym grant berýshiden venchýrlyq fýnktsıonalmen tolyǵady. Endi qordyń mindeti – jeke ınvestıtsııalarmen, venchýrlyq qorlarmen jumys isteý jáne kepilger retinde qyzmet etý, sonymen qatar birlesken venchýrlyq qorlardy qurý úshin memlekettik múmkindikti paıdalaný.

«Investıtsııalyq qarjylandyrýdyń tehnologııalyq prıntsıpterin biz úlken ǵylymǵa ákelemiz. Álemde bul protsess áldeqashan bastalǵan. Qazir tsıfrlyq órkendeý zamanynda aýqymdy ınvestorlar ǵylymı jańashyldyqtardyń qundylyq pen damı túsýdiń jańa múmkindigi ekenin jaqsy túsinedi. Jańa zańda mundaı novellalar óte kóp», – deıdi vedomstvo basshysy. 

Sondaı-aq, S.Nurbek Qazaqstannyń ShYU-ǵa múshe eldermen yntymaqtastyqty ilgeriletýge ashyq ári daıyn ekenin atap ótti. Onyń aıtýynsha, otandyq ǵylym ashyq keńistikke shyǵýy tıis. 

«Qazaqstandyq ǵalymdardyń jańa baılanystar ornatyp, tilderdi úırenýi óte mańyzdy. Qazir yntymaqtastyq pen úlken múmkindikterdi paıdalaný ýaqyty. Biz álemde bolyp jatqan úlken ınnovatsııalyq tolqyndardan artta qalmaýymyz kerek», – dep tolyqtyrdy Ǵylym jáne joǵary bilim mınıstri. 

Buǵan deıin habarlaǵanymyzdaı, elimizdegi ulttyq ýnıversıtetterde qytaı tilin oqytatyn kafedralar qurylady. 

Aıta keteıik, Astanadaǵy Eýrazııa ulttyq ýnıversıtetinde Lý Ban sheberhanasy ashylatyny týraly jazǵan edik. 

Búgin elordadaǵy Astana IT ýnıversıtetinde «Joǵary bilim berý jáne óndiristi ıntegratsııalaý salasyndaǵy yntymaqtastyq» degen ataýmen halyqaralyq sımpozıým ótip jatyr. 

Oǵan QHR Bilim mınıstri Hýaı Tszınpen, QR Ǵylym jáne joǵary bilim mınıstri Saıasat Nurbek, Jibek joly ýnıversıtetteri alıansynyń hatshylyǵy, Ál-Farabı atyndaǵy Qazaq ulttyq ýnıversıtetiniń Basqarma Tóraǵasy – Rektory Janseıit Túımebaev, Sıan Tszıaotýn ýnıversıtetiniń rektory Chjan Lıtsıýn, Astana IT ýnıversıtetiniń rektorynyń mindetin atqarýshy Serik Ómirbaev jáne 20 joǵary oqý ornynyń rektory qatysty.