Shyrt uıqyda jatqan polıtsııa qyzmetkerlerinen sytylyp shyqqan eki aqtóbeliktiń isi sotta qarala bastady

<p>AQTÓBE. KAZINFORM &ndash; Ýaqytsha tergeý ızolıatorynan qashyp, belgisiz jaqqa ketip qalǵan eki aqtóbelik ustalyp, búgin isi sotta qarala bastady. Eki kúdikti qashqan kezde polıtsııanyń kúzetindegi qyzmetkerler shyrt uıqyda jatqan.</p>

№2 Aqtóbe qalalyq sotynda eki qylmystyq is bir óndiriske alyndy. 

Qazirgi kezde tergeý ızolıatorynan qashqan eki sottalýshyǵa qatysty aıyptaý aktisi oqyldy.

Іs materıalyna súıensek, Muǵaljar aýdany Qandyaǵash qalasynyń 26 jastaǵy turǵyny byltyr 31 qazanda qaladaǵy saýda – oıyn-saýyq keshenine baryp, altyn buıymdar satatyn býtıktiń kúzetindegi osal tusyn ańǵarady. Bir kún ótken soń sol jerge qaıta baryp, qara matadan ońaı ótip, ishke enedi. Sol kezde quny 23,5 mln teńge turatyn altyn buıymdardy, 10 myń teńge aqshany jáne 1,2 mln teńge bolatyn qural-jabdyqty sómkege salyp, alyp ketedi.

Býtık ıesiniń jalpy shyǵyny 24,7 mln teńgeden asyp ketken. Keıin ol arada eki kún ótkende ustalyp, tergeý ızolıatoryna qamalady.

– 2023 jyldyń 6 qarashasy kúni ýaqytsha ustaý ızolıatorynda otyrǵan onyń janyna buzaqylyq jasady degen kúdikpen taǵy bir kúdikti jetkiziledi. 2023 jyldyń qarashasy kúni ekeýi qashyp shyǵýdy oılastyrady. Al 12 qarasha kúni saǵat 03:24-te olar esiktiń tamaq berýge arnalǵan temir tory jabylmaı turǵanyn kóredi. Dybys shyǵarǵan kezde eshkim jaýap bermegen soń polıtsııa qyzmetkerlerinen esh kedergi joq ekenin uǵyp, tordan qolyn shyǵaryp, esiktiń ilmegin ashyp jiberedi. Keıin uıyqtap jatqan kezekshi polıtsııa qyzmetkerleriniń janynan ótip, ekinshi qabatqa kóteriledi. Ol jaqtan shyǵar esik tappaǵan soń qaıta birinshi qabatqa túsip, temir esikti qatty ıterip qalady. Keıin aýladaǵy temir qorshaýdan sekirip, qashyp ketedi,- dedi prokýror Ásel Ýtenova.

Sot otyrysy kezinde jábirlenýshi men sottalýshy medıatsııalyq kelisimge kelgeni bilgili boldy. Jábirlenýshi shyǵynnyń tolyq ótelgenin aıtyp, sottalýshyny bas bostandyǵynan aıyrmaýdy surady.

Aıta keteıik, bir kamerada otyrǵan ekinshi sottalýshy buǵan deıin eki ret zań buzyp, bas bostandyǵynan shekteý jazasy taǵaıyndalǵan. Eki qateligi de sabaq bolmaı, dosymen birge ishimdik iship, kóshede eki adamǵa tıisken. Uryp-soqqany úshin ustalyp, ýaqytsha tergeý ızolıatoryna qamalǵan.

Qazirgi kezde Qylmystyq kodekstiń «Buzaqylyq» jáne «Bas bostandyǵynan aıyrý oryndarynan, qamaqtan nemese kúzetten qashý» baptary boıynsha aıyp taǵylyp jatyr. Al janynda bolǵan dosyna Qylmystyq kodekstiń «Buzaqylyq» baby boıynsha aıyp taǵyldy.

Sot otyrysy jalǵasyp jatyr.