Shirik-Rabat qalasynan 40 shaqyrym jerde sheberler aýyly tabyldy-Qyzylorda

 QYZYLORDA. QazAqparat- Shirik-Rabat - kóne qalanyń orny. Qarmaqshy aýdany T.Kómekbaev aýylynan ońtústik-batysqa qaraı 100 shaqyrym jerde,  Jańadarııa arnasynyń sol jaq jaǵalaýyndaǵy eń bıik tóbeniń ústine ornalasqan shamamen b.z.b. 4-2 ǵasyrlardaǵy qala. 

 
     Elimizdegi eń alǵash qysh-qumyra jasaý isi Syrdarııanyń boıynda bastalǵan. Bizdiń zamanymyzǵa deıingi myńjyldyqtyń orta kezeńinde saqtar mekendegen Shirik-Rabat qalasyn zertteýshi ǵalymdar osyndaı tujyrymǵa kelip otyr. Oǵan sebep kóne qala mańynan kózeshiler aýylynyń tabylýy. Bul týraly QazAqparat tilshisi aýdandyq ákimdikke silteme jasap habarlady.

        Qysh ydystar óndirgen sheberler aýyly Shirik-Rabat qalashyǵynan 40 shaqyrym jerde jatyr. Aýmaǵy 3-4 gektardy quraıdy.  Arheologııalyq zertteý barysynda ázirge 11 peshtiń jáne turǵyn úıler men sheberhanalardyń orny tabyldy. Búgingi kúni  qysh kúıdiretin 6 pesh pen sheberhana tolyqtaı ashyldy. Sonymen qatar úı-jaılardyń ornynan astyq saqtaıtyn iri kólemdegi ydystar qazylyp alyndy. Tabylǵan peshter tórt buryshty jáne domalaq. Olar eki qabattan turady, ishine ottyq salǵanda ústine qysh ydystaryn qoıyp, kúıdirgen. Arheologtar Shirik-Rabat qalashyǵy aýmaǵynan tabylǵan tsıtadel - bekinis ornyn da zertteýde. Bul jerde kóne shahardy mekendeýshilerdiń turmysy men ǵurpyn tanytatyn qundy jádigerler jetkilikti.

      Aıta keteıik, Aral mańyndaǵy birqatar  tarıhı eskertkishterdi 1946 jyldan bastap Horezm arheologııalyq-etnografııalyq espedıtsııasy zerttegen bolatyn. Alaıda 90-shy jyldary turalap qalǵan bul jumys 2004 jyly «Mádenı mura» baǵdarlamasy aıasynda qaıta jandandy.