Shymkent halqynyń 99,9 paıyzy tabıǵı gazben qamtylǵan

<p>ASTANA. KAZINFORM — Energetıka vıtse-mınıstri Erlan Aqkenjenov Shymkent qalasynyń turǵyndarymen kezdesý ótkizdi. Onda óńirdiń otyn-energetıka keshenindegi aǵymdaǵy jaǵdaıyna toqtalyp, qala turǵyndarynyń jylý máselesine, gazben qamtamasyz etý, JEO jóndeý jumystarynyń barysy jáne aldaǵy jylytý maýsymyna daıyndyǵy talqylandy. </p>

Jıyn barysynda gazdandyrý boıynsha eń joǵary kórsetkishtiń biri Shymkent qalasynda tirkelip otyrǵany sóz boldy. 

Onyń deńgeıi — 99,9% nemese 1 mln 173 myń adam tabıǵı gazǵa qol jetkizgen. 

Bıyl 9 jobany (4 jalǵasýda, 5 jańa) iske asyrý josparlanǵan.

Onyń nátıjesinde keleshekte qosymsha 80 myńnan astam adam tabıǵı gazǵa qol jetkize alady jáne gazdandyrý deńgeıi 100% bolady.

Sonymen qatar vıtse-mınıstr 2025 — 2026 jyldarǵa arnalǵan bıýdjettik baǵdarlama sheńberinde «Yntymaq shaǵynaýdanynda 110/35/10 kV kishi stantsııa jáne 110 kV elektr jelilerin salý» jańa jobasyn iske asyrýǵa 5,0 mlrd teńge mólsherinde qarajat bólý qarastyrylyp jatqanyn atap ótti.

Jobany júzege asyrý barysynda Yntymaq, Batys, Soltústik saıajaı, Jańaturlan, Temirshi áýlıe shaǵynaýdandary men qalanyń soltústik-batys bóligindegi jańa áýejaı termınalynyń 45 myńǵa jýyq turǵyny úzdiksiz elektr qýatymen qamtamasyz etiledi.

Taǵy bir mańyzdy baǵyt — suıytylǵan munaı gazy naryǵy. Shymkent qalasynda suıytylǵan munaı gazynyń shekti bólshek baǵasy — 1 lıtri 70 teńge.

Óńirde 4 gaz toltyrý stantsııasy jáne 192 avtomobılge gaz quıý stantsııasy bar.

Oblysta suıytylǵan munaı gazyn tutyný qańtar-maýsym aılarynda 68 myń tonna boldy, ótken jyldyń uqsas kezeńinde shamamen 59 myń tonna tutynylǵan. 

«Uzaqmerzimdi baǵa turaqtylyǵyn jáne baǵanyń alypsatarlyq jolmen kóterilýine jol bermeýdi qamtamasyz ete otyryp, suıytylǵan munaı gazy naryǵyn reformalaý jóninde sharalar qabyldap jatyrmyz. Bul sharalar suıytylǵan munaı gazyn satýdyń shekti bólshek baǵasyn belgileý arqyly bólshek saýda baǵasynyń kúrt ósýin boldyrmaýǵa múmkindik beredi», -dedi E. Aqkenjenov.

Sonymen qatar, vıtse-mınıstr Erlan Aqkenjenov turǵyndardy qyzyqtyrǵan suraqtarǵa jaýap berdi, sondaı-aq kásipkerlik sýbektilerimen Shymkent qalasyn suıytylǵan munaı gazymen qamtamasyz etý máselesin talqylady.

SMG aımaqtar boıynsha bólý boıynsha normatıvtik-quqyqtyq aktilerge qatysty máseleler qaraldy.