Shymkenttiń eks-ákiminiń aǵasy bes táýlikke qamaýǵa alyndy

<p>ASTANA. KAZINFORM &ndash; Áleýmettik jelilerde Shymkent qalasynyń eks-ákiminiń aǵasy Marat Áıtenovtiń burynǵy áıeli men balalaryn úıinen aıaýsyz qýyp jatqany týraly beınejazba taraǵan bolatyn. Kóp uzamaı bul is sotta qaraldy.</p>

Astana qalasynyń Ákimshilik quqyq buzýshylyq ister jónindegi mamandandyrylǵan aýdanaralyq sotynda ÁQBtK-niń 73-babynyń 1-bóligimen quqyq buzýshyǵa qatysty is qaraldy.

Іstiń mán-jaıyna sáıkes, Áıtenov otbasylyq janjal kezinde óziniń burynǵy áıeline ar-namysy men namysyn qorlaıtyn sózder aıtqan. Basqa adamdardyń da tynyshtyǵyn buzǵan. Biraq ol sot otyrysynda óz kinásin moıyndamady.

«Ol burynǵy áıeli balalardan bas tartqanyn aıtqannan keıin balalardy alyp ketýge kelgen. Anasy balalaryn jibermegendikten, kúshpen tartyp alýǵa tyrysqan. Biraq ádepsiz sózder aıtpaǵanyn jáne urmaǵanyn alǵa tartyp otyr», - delingen sot habarlamasynda.

Al jábirlenýshiniń aıtýynsha, burynǵy kúıeýi ony úıden shyǵarý kezinde zańsyz áreket jasap, denesine zaqym keltirgen.

«ÁQBtK-niń 73-babynyń 1-bóliginiń sanktsııasy joǵaryda atalǵan mán-jaılardy, sondaı-aq qoǵamǵa teris áser etetin is-árekettiń kólemi men sıpatyn eskere otyryp, eskertý nemese 5 táýlikke ákimshilik qamaýǵa alýdy qarastyrady. Quqyq buzýshy ÁQBtK-niń 73-babynyń 1-bóligimen kináli dep tanyldy. Ol 5 táýlikke qamaýǵa alyndy», - delingen Astana qalasynyń Ákimshilik quqyq buzýshylyq ister jónindegi mamandandyrylǵan aýdanaralyq sotynyń baspasóz qyzmeti taratqan aqparatta.

Qaýly zańdy kúshine engen joq.

Esterińizge salsaq, elorda turǵyny Dana Ateshova burynǵy kúıeýi Marat Áıtenovtiń polıtseılermen jáne jeke sot oryndaýshylarmen birge úıine kelip, balalardy bir-birlep úıden májbúrlep shyǵarǵanyn, ózin soqqyǵa jyqqanyn áleýmettik jelide jarııalaǵan bolatyn.