Shymkenttik eriktiler kommýnaldyq qyzmetkerlerge ystyq shaı men baýyrsaq taratty

<p>Shymkentte eriktiler kóshe tazalaýǵa shyqqan kommýnaldyq qyzmetkerlerge tegin shaı men ystyq nan taratty. Jastar qaıyrymdylyq aktsııasyn dástúrge aınaldyrǵan, dep habarlaıdy <a href="https://www.inform.kz/?_gl=1*4skk3t*_ga*MTQ5NjUxODU0OS4xNjc3MTQ5MTQy*_ga_Y44SMVECD5*MTcwNDU3MTUzMi42OTEuMS4xNzA0NTcyMzUyLjExLjAuMA..&amp;pk_vid=300c61a6e20cef4f1704572537b83076" target="_blank" rel="noopener">Kazinform</a>.</p>

«Otyrar» arnasynyń jazýynsha, eriktiler 5 jyldan beri muqtaj otbasylardy qoldaýdy ári medıtsınalyq kómek kórsetýdi de jalǵastyryp keledi.

Shymkenttegi kommýnaldyq qyzmetkerler eriktiler tobyn jaqsy tanıdy. Sebebi, jastar qysy-jazy tań atysymen eńbek adamdarynyń jumysyna kómektesip, ystyq shaı men nan-baýyrsaqtaryn usynyp keledi.

«Kún sýyqta kishkene denemizdi jylytyp, marqaıtyp, kóńilimizdi kóterip ketip jatqan erikti balalarǵa kóp raqmet aıtamyz. Osynyń ózi úlken kúsh beredi, qýat beredi», - deıdi jumysshy Sáken Jambylov.

Erikteler toby jaqynda ǵana kópbalaly ana ári ІІ toptaǵy múgedek Kúnsulý Ahmetovaǵa qýanysh syılady. Ol qaıyrymdy jandardyń arqasynda baspanaly boldy. Kúnsulýdyń januıasy — belsendilerdiń uıymdastyrýymen keıingi 6 jyldyń ishinde qonys toıyn ótkizgen jıyrmasynshy otbasy.

«Ómirde qaıyrymdy jandar óte kóp eken. Oǵan kózim jetti. Mine, oılamaǵan jerden baspanaly bolyp otyrmyn», - deıdi Kúnsulý Ahmetova.

Qalada eriktilerdiń bastamasymen ashylǵan «Іzgilik» dúkeni jumys isteıdi. Munda turǵyndar qolda bar baǵaly zattaryn, kádege jaraıtyn buıymdaryn ótkize alady. Taza kıimderin ákelip, qaıyrymdylyq aktsııasyna úles qosa alady. Máselen, tek ótken jyldyń ózinde az qamtylǵan myńnan asa otbasyǵa qamqorlyq kórsetildi.

Eriktiler túrli tótenshe apattan zardap shekkenderge de kómektesip, belsendilik tanytyp júr. Qazir olardyń qatarynda 120 azamat bar.