Shymkenttegi Eńbekshi aýdanynda jańa gúlzar ashyldy
Jańa áleýmettik nysan kásipkerler tarapynan iske asyrylyp otyr. Aýmaǵy 1,1 gektar gúlzarda turǵyndarǵa barlyq qolaıly jaǵdaı jasalǵan. Qala ákimi Ǵabıt Syzdyqbekov jańa gúlzardyń ashylýyna qatysyp, turǵyndarmen kezdesti.
Aýdanda 2022 jyly «Qazaqstan-Túrkııa dostyǵy» saıabaǵy turǵyndar ıgiligine berilgen edi. Bıyl taǵy bir jańa gúlzar turǵyndarǵa qýanysh syılady. Jańa nysan – BI group kompanııasynyń qalaǵa syı retinde tartýy. Jumysshylar qurylysty 1,5 aı ishinde, qala kúnine oraı aıaqtady. Alleıa BIG TULIP ataýyn ıelengen. Tulip túrki tilinde qyzǵaldaq degen maǵynany beredi. Alleıaǵa kireberistegi 5 qyzǵaldaq túnde jarqyrap, qalanyń kórkin ashady. Kompanııa ókili Qaırat Qýanyshbaevtyń aıtýynsha, qyrkúıek aıynda taǵy bir joba tapsyrylmaq.
Buǵan deıin zańsyz saýda nysandary bolǵan aýmaq osylaısha abattanǵan orynǵa aınaldy. Qala ákimi turǵyndarǵa qolaıly orta qalyptastyrý jumystary odan ári jalǵasa beretinin aıtty.
«Ózderińiz bilesizder, bundaı nysandarǵa bıýdjetten qarjy bólinip jatqan joq. Bári de kásipkerlerdiń óz bastamasymen, syı retinde salynyp jatyr. Osy iske úles qosqan sizderge de raqmet. Igilikterińizge paıdalanyńyzdar. Jaqsy oryndar kóbeıe bersin. Endi osy nysandy ózderińiz kútip ustańyzdar. Jalpy, halyqtyń da tazalyqqa degen sanasy ózgerýi kerek. Qazir qalada sýburqaqtardyń eskirgen nasostaryn aýystyryp jatyrmyz. Jaqyn arada ony da iske qosamyz», – dedi qala ákimi turǵyndarmen kezdesýde.
Óz kezeginde qala turǵyndary da shahar basshysyna rızashylyǵyn aıtty. Osyndaı jańa gúlzarlar kóptep ashylǵaly jastardyń, turǵyndardyń da tazalyqqa degen oıy ózgere bastaǵanyn jetkizdi.
Qyzǵaldaq – qalamyzdyń sımvoly. Big Tulip ataýy adamdardyń nazaryn osy ádemi gúlge aýdarýdy kózdeıdi.