Shymkent psıhıkalyq ortalyǵyndaǵy zorlyq: Kúdiktiler ustaldy

<p>ShYMKENT. KAZINFORM &ndash; Shymkent qalasyndaǵy psıhıkalyq densaýlyq ortalyǵynyń eki qyzmetkeri ýaqytsha ustaý ızolıatoryna qamaldy. Kúdiktiler kámeletke tolmaǵan naýqas pen 21 jastaǵy qyzdy zorlady dep aıyptalyp otyr, dep habarlaıdy QazAqparat tilshisi.</p>

Psıhıkalyq dertke shaldyqqandarǵa arnalǵan medıtsınalyq mekemedegi atyshýly isti tergeý barysynda jańa derekter belgili boldy.

Polıtsııaǵa aldymen shızofrenııamen aýyratyn 17 jastaǵy qyzdyń anasy habarlasqan. Ol qyzynyń oblystyq psıhıkalyq densaýlyq ortalyǵynda emdelip jatqanda sondaǵy qyzmetkerlerden zorlyq-zombylyq kórgenin aıtqan.

Foto: Tatıana Korıakına/ Kazinform

Jábirlenýshi taraptyń aıtýynsha, aýrýhananyń eki qyzmetkeri qyzdyń dármensiz jaǵdaıyn paıdalanyp, tósekke baılap tastaǵan. Kúshti dáriler salǵandyqtan, qarsylyq tanytý múmkin bolmaǵan. Sodan qyz júkti bolyp, jasandy túsik jasatýǵa májbúr bolǵan.

Dál osyndaı jaǵdaıdy sol mekemede emdelgen 21 jastaǵy naýqas qyzda bastan ótkergen. Ol da sanıtar qyzmetkerlderdiń zorlyq-zombylyǵyna ushyraǵan.

Jábirlenýshilerdiń týystary tergeýdiń keshiktirilip jatqanyna shaǵymdanǵan bolatyn. Baqylaý kamerasyndaǵy beınejazbany kórýge ruqsat bermegenin, ıaǵnı, bul aıǵaqtardy tabý protsesin qıyndatyp jatqanyn jetkizgen edi.

Shymkent qalalyq polıtsııa departamentiniń resmı ókili Baǵlan Isataeva tergeýdiń jalǵasyp jatqandyǵyn málimdedi.

— Buryn habarlanǵandaı, polıtsııa psıhıatrııalyq aýrýhanada zorlaý deregi boıynsha qylmystyq is qozǵady. Qazirgi ýaqytta keshendi tergeý sharalary júrgizilýde. Eki kúdikti sot sanktsııasymen qamaýǵa alyndy, - dedi Baǵlan Isataeva.

Bul rette oblystyq densaýlyq saqtaý basqarmasy kópshilikti aldyn ala qorytyndy jasaýǵa asyqpaýǵa, tergeýdiń aıaqtalýyn kútýge shaqyrdy.

— Rastalmaǵan aqparatty taratýdan bas tartyp, tek resmı aqparat kózderine senýge shaqyramyz. Bul jalǵan aqparattyń aldyn alady jáne tergeýdiń obektıvtiligin qamtamasyz etedi. Qazirgi tańda Shymkent qalasy Ál-Farabı APB júrgizip jatqan tergeý amaldary áli aıaqtalǵan joq. Sondyqtan aldyn ala taǵylǵan aıyptar negizsiz, - delingen Túrkistan oblysy densaýlyq saqtaý basqarmasynyń resmı habarlamasynda.

Sondaı-aq «aıyptar rastalsa, psıhıatrııalyq aýrýhana qyzmetkerleri qylmystyń aýyrlyǵyna qaraı jazalanady»,- dep qosty departament. Áıtpese, olar jala jabý jáne negizsiz aıyptaý úshin sotqa shaǵymdanýǵa quqyly.